Илдар Халиков: “Суд приставларының эшчәнлек сыйфаты җәмгыятьнең дәүләт системасына ышанычын билгели”

“Суд приставларының эше һәрвакыт авыр һәм катлаулы булды. Суд приставлары федераль хезмәтенең ТР идарәсе гражданнарга, җәмгыятькә закон, суд системасы булуын, кануннарның, суд карарларының үтәлергә тиешлеген һәрдаим искә төшереп тора. Аларның эшчәнлек сыйфаты халыкның, предприятие-оешмаларның судларга, гомумән, дәүләт системасына булган ышанычын билгели”. ТР Премьер-министры Илдар Халиков бүген Суд приставлары федераль хезмәте ТР идарәсенең ел йомгакларына багышланган коллегиясендә ясаган чыгышында шулай дип белдерде.

Премьер-министр 2011 елда Суд приставлары федераль хезмәтенең ТР идарәсе алдына куелган өстенлекле юнәлешләр буенча яхшы динамикага иреште, дип саный. Шуның берсе – предприятиеләрдә хезмәт хакының вакытында түләнүенә ирешү. Илдар Халиков бу юнәлештә темпларны киметмәскә, хезмәт законнарын бозу очраклары буенча мәгълүмат юллау практикасын дәвам итәргә, алимент бурычларын түләтүгә игътибарны аеруча көчәйтергә чакырды.

“Вакытында түләнмәгән салым бурычларны кайтару буенча әле тулсынча канәгать кала алмыйбыз, шул ук вакытта Пенсия фондына бурычларны кайтару буенча уңай тенденция бара, бу юнәлешләрдә эшне активлаштырырга кирәк”, - диде ул.

Кануннарга кертелгән үзгәрешләр нәтиҗәсендә, суд приставларына хәзер суд карарларын үтәтү буенча юлланган эшләр нигезендә, законсыз мигрантларга билет алып аларны чик пунктына кадәр озата бару вәкаләте бирелгән. “10 ел элек кенә мигрантлар белән бәйле проблеманың була алуын күзалламый идек. Биредә алдан күреп, төгәл эш йөртү кирәк”, дигән фикердә ул.

Суд приставлары бүлекләрендә бүген кадрларның еш алмашы төп проблема булып тора. Аның чишелеше, Илдар Халиков фикеренчә, югары уку йортларында квалификацияле кадрлар әзерләүне көчәйтү мәсьәләсендә. “Юридик белемгә ия булудан тыш, психологик яктан да әзер булган яхшы кадрлар резервы булганда гына эшләргә җиңелрәк”, -дип ассызыклады ул. Премьер кадрлар составының торыклылыгына ирешүдә остазлыкның, тәҗрибә тапшыруның ролен аерым ассызыклады.

Илдар Халиков идарә эшчәнлегендә 2011 елның нигез күрсәткечләрен, гомумән алганда, яхшы дип бәяләп, суд приставларына авыр эшләрендә уңышлар теләде. Соңыннан ТР Хөкүмәте башлыгы бертөркем хезмәткәрләргә дәүләт бүләкләрен тапшырды.