Рөстәм Миңнеханов "Татмедиа" ААҖ редакция-нәшрият комплексында булды

Бүген Татарстан Президенты Рөстәм Миңнеханов “Татмедиа” ААҖ редакция-нәшрият комплексында алып барыла торган ремонт эшләре белән танышты.

Республика матбугат һәм гаммәви коммуникацияләр агентлыгы җитәкчесе Марат Моратов республика башлыгына комплекс бинасында алып барыла торган эшләр хакында сөйләде. Рөстәм Миңнехановны ТР Президенты Аппараты җитәкчесе Юрий Камалтынов, ТР Президентының Эчке сәясәт мәсьәләләре идарәсе башлыгы Александр Терентьев, “Татмедиа” ААҖ генераль директоры Айдар Сәлимгәрәев һәм башкалар озатып йөрде.

Шәһәр ансамбле элеккеге “Нәшрият”ның яңартылган бинасы белән тулыланды.

Бинаның тышкы ягындагы эшләрдән тыш, биредә коммуникацияләр алыштырыла, бүлмәләр ремонтлана. “Премиум Групп” компаниясе директоры Татьяна Григорьева билгеләп үткәнчә, “Татмедиа” объектында шәһәрдә беренче тапкыр композит материалдан эшләнгән зур форматлы кассеталар кулланганнар. Фасад эшләреннән тыш, компаниягә бер үк вакытта реклама баннерлары өчен конструкцияләр урнаштыру һәм юбашка бурычларны да хәл итәргә туры килгән.

40 ел эчендә күп кенә проблемалар туган: конструкцияләр искергән, бинаның түбәсе авария хәленә килгән. Фасадны ремонтлау эшләре 2011 елда башлана, бинаның эчендә исә төзекләндерү эшләренә 2010 елда ук керешәләр.

Бүген Рөстәм Миңнеханов басма производствога кагылышлы үзгәрешләр белән дә танышты. Газета цехында 1200 квадрат метр мәйданда ремонт ясалган, лифт, җылылык трассасы алыштырылган. Татарстан Президентына яңа офсет машинасын күрсәттеләр.

Бинада башкарылган эшләр, көнкүреш һәм җитештерү корпусларында алга таба реконструкция үткәрүгә бәйле тәкъдимнәр белән танышканнан соң, Татарстан Президенты Рөстәм Миңнеханов сәнәгать дизайны стилендә берничә вариант әзерләргә һәм бинаның тышкы күренеше, проектның бәясе буенча оптималь чишелеш табарга күрсәтмә бирде.