Татарстан мәктәпләрендә капиталь ремонт ясау программасы кысаларында башкарыласы эшләр исемлеге озынайтылды

Бүген Татарстан Президенты Рөстәм Миңнеханов йөкләмәсе буенча капиталь ремонт ясау программасы кысаларында башкарыласы эш исемлегенә мәктәп бәдрәфләрен ремонтлау да өстәлде.

Бу хакта республика башлыгы мәктәпләрдә капиталь ремонт үткәрү мәсьәләләре буенча видеоконференция режимында узган киңәшмәдә белдерде. Рөстәм Миңнеханов киңәшмәне Ленигорскидан үткәрде. Анда шулай ук ТР Премьер-министры Илдар Халиков та катнашты.

Моннан тыш, бүген Президент эш алып бару формасын ата-аналар комитеты белән килешүне таләп итте. Аның сүзләренә караганда, һәр мәктәптә ата-аналар җыелышы үткәрергә һәм мәктәптә нинди эшләр башкарылачагын сөйләргә, шулай ук ата-аналар ярдәм итә аламы дип кызыксынырга кирәк. Шулай ук ул бу эштә ярдәм итәргә теләгән предприятие җитәкчеләре белән сөйләшүне сорады.

“Мондый эш формасы мәктәпләрне ремонтлау өчен билгеле ресурс формалаштыру мөмкинлеге бирә. Проект уңышлы булырга тиеш. Татарстан мәктәпләре республика имиджына туры килергә тиеш. Безнең балаларның уңайлы шартларды укуын телибез. Ничек кенә авыр булмасын, бу эшне башкарып чыгачакбыз”, - диде Рөстәм Миңнеханов.

Бүгенге киңәшмәдә капиталь ремонт үткәрелә торган мәктәпләр исемлегенә авария хәлендәге мәктәпләр һәм оптимальләштерелә торган уку йортлары керми дип белдерде Илдар Халиков.

Хәзерге вакытта муниципаль берәмлекләр капиталь ремонт үткәрелә торган объектлар буенча проект-смета документларын әзерли. Сметалар ТР Баш инвестиция-төзелеш идарәсенә юнәлдерелә, дип белдерде ТР төзелеш, архитектура һәм торак-коммуналь хуҗалык министры Ирек Фәйзуллин.
Муниципаль гомуми белем бирү мәктәпләреннән тыш, дәүләт коррекция мәктәпләре һәм мәктәп-интернатлар да капиталь ремонт таләп итә. 2012-2014 елларда ТРдагы 55 махсус коррекция мәктәпләренең 42 учреждениесендә капиталь ремонт үткәрү кирәк. ТР Мәгариф һәм фән министрлыгы 2012 елда капиталь ремонт үткәрү кирәк булган 16 учреждение кергән коррекция мәктәпләре исемлеген (шул исәптә Казанның 5 коррекция мәктәбе) тәкъдим итте.