Татарстанда мәктәпләргә капиталь ремонт ясау программасының күләме 2012 елда 2 миллиард сумга җитте диярлек

Татарстан Президенты Рөстәм Миңнеханов йөкләмәсе һәм ТР Хөкүмәтенең быел 30 гыйнварда кабул ителгән 126 нчы күрсәтмәсе буенча, муниципаль мәктәпләрдә капиталь ремонт ясау программасы кысаларында башкарыласы эшләр исемлегенә, мәктәпләрне тикшергәннән соң, бүлмәара ишекләрне алыштыру, мәктәп санитар узелларны ремонтлау да өстәлде. Гомумбелем бирү мәктәпләрен капиталь төзекләндерүгә быел 1 млрд. 548,5 млн. сум акча каралган, ләкин, мәктәпләрнең расланган исемлегенә кергән 154 мәктәпнең югарыда әйтелгән тагын өстәмә 2 пунктын гамәлгә ашыруга 303,9 млн. сум акча кирәк, мәсәлән, 12,9 мең ишек алыштыру, 23,5 мең кв.м. гомуми мәйданда санузелларны ремонтлау, ә кайсыларында мәктәпкә тоташтырып төзү. Шул рәвешле, капиталь ремонтта 6 төр эш каралган: мәктәп түбәләрен, тәрәзәләрен, ишекләрен алыштыру, инженерлык челтәрләрне, мәктәпкә керү урыннарын, санитар узелларны тиешле дәрәҗәгә китерү. 154 мәктәпкә барлыгы 1 млрд. 925,4 млн. сум акча таләп ителә.

1 март белешмәсе буенча, Казан каласы һәм Азнакай, Әтнә, Кайбыч, Минзәлә, Менделеевск, Чүпрәле районнары - барлыгы 7 муниципалитет капиталь ремонт эшләрен башкарып чыгардай подряд оешмасы табып-сайлап куймаган.

Бүген ТР Министрлар Кабинетында “ТКХны реформалауга ярдәм фонды турында”гы 185 нче федераль законны быел республикада тормышка ашыру һәм мәктәпләрне капиталь төзекләндерү мәсьәләләре буенча республикакүләм киңәшмәдә ТР төзелеш, архитектура һәм торак-коммуналь хуҗалык министры Ирек Фәйзуллин шундый мәгълүматлар китерде. “Бу эшне тәмамлап, инде комплектлау материалларын тупларга тотынырга кирәк, дип белдерде ул муниципалитетлар белән берлектә видеоконференция рәвешендә барган киңәшмәдә.

Президент Рөстәм Миңнеханов исә һәрбер мәктәпнең үз химаячысы (спонсоры) булырга тиеш дип саный. Мондый эш формасы мәктәпләрне ремонтлау өчен билгеле ресурс формалаштыру мөмкинлеге бирә. Проект республика имиджына туры килергә тиеш. Химаячылар җәлеп итү буенча эш алып барылсын, дип киңәш итте республика башлыгы.

Утырышта ТР мәгълүматлаштыру һәм элемтә министры Николай Никифоров сүз сорап, капиталь ремонт уздырыласы мәктәпләрдә Интернет һәм WI-FI мөмкинлекләреннән файдалану өчен куелган җиһазлар һәм челтәрләр сакланылышы, сүтеп алу, монтажлау эшләре техник заданиегә аерым пункт буларак алар җаваплылыгына кертелсен, дип проблема күтәрде. Андый җиһазларны монтажлау һәм сүтеп алу хезмәтләре түләүле, җиһазлары кыйммәт, шуңа күрә, җаваплылык үз җилкәләрендә булсын, ә капремонтны тапшырганда аларны Мәгълүмати технологияләр үзәге кабул итеп алсын, дигән тәкъдим кертте министр.