Татарстан Республикасы Хөкүмәте

8 Март – Халыкара хатын-кызлар көне уңаеннанТатарстан Республикасы Президенты Р.Н.Миңнехановның хатын-кызларга мөрәҗәгате

2012 елның 7 марты, чәршәмбе

Кадерле хатын-кызлар!

Сезне язның күркәм бәйрәме – Халыкара хатын-кызлар көне белән чын йөрәктән тәбрик итәм!

Безнең илдә яшәүчеләрнең күпчелеген гүзәл затлар тәшкил итә, шуңа күрә бу бәйрәм зур иҗтимагый әһәмияткә ия, ул инде күптән бөтенхалык тантанасына әверелде.

Бу язгы бәйрәм барыбызга да игелек һәм күтәренке рух алып килә. Хатын-кыз – ул үзе бер дөнья, анда һәрвакыт мәхәббәт һәм матурлык яши, ана булу хисе һәм гаилә турында кайгырту өстенлек итә. Хатын-кызның гүзәллегенә, зиһененә, талантына, сөйкемлелегенә меңнәрчә гасыр дан җырлана. Менә бүген дә без яраткан хатын-кызларбызны – әниләребезне, хәләл җефетләребезне, апа-сеңелләребезне, кызларыбызны котлар өчен иң ягымлы, иң назлы сүзләр табабыз.

Хәзерге вакытта җәмгыять һәм дәүләт тормышының бер генә өлкәсен дә хатын-кызлардан башка күз алдына китереп булмый. Алар икътисадка, мәгарифкә, сәламәтлек саклауга, мәдәнияткә, фәнгә чагыштыргысыз зур өлеш кертәләр. Республикабыз сәнәгатьтәге, авыл хуҗалыгындагы, эшмәкәрлектәге уңышлары белән күп очракта сезгә бурычлы.

Язмышларына авыр сугыш заманы һәм илне торгызу еллары туры килгән өлкән буын хатын-кызлары аерым рәхмәткә һәм ихтирамга лаек. Хатын-кыз ветераннарыбызга карап сокланасың: бу сынаулар аларның рухын сындыра алмаган, йөрәкләрендә җылылык һәм юмартлык элеккечә иксез-чиксез, балаларына да, оныкларына да, оныкларының балаларына да җитәрлек.

Хатын-кызларның социаль активлыгы елдан-ел арта бара, аларның җәмгыятьнең сәяси тормышына, дәүләт һәм җирле үзидарә органнары эшчәнлегенә катнашуы торган саен зуррак әһәмияткә ия. Шул ук вакытта безнең гүзәл затлар төрле вазифаларда, гадәттәгечә, яңа башлангычлар белән чыгалар, иҗади рухта, үз эшләренең нәтиҗәсе өчен олы җаваплылык тоеп эш итәләр.

Безгә, ир-егетләргә, һәрвакыт шуны истә тотарга кирәк: хатын-кызлар – бәясез байлыгыбыз, без аларны иркәләп-назлап, кадерләп сакларга тиешбез. Хөрмәтле хатын-кызлар, без сезгә ихлас күңелдән рәхмәтлебез - булганыгыз өчен, җылы кулларыгыз, киң күңелегез, сөюле йөрәкләрегез өчен.

Тормышыгызда игелек, наз, мәхәббәт ташып торсын, туганнарыгыз, якыннарыгыз, дусларыгыз тарафыннан игътибар һәм ихтирам тоеп, шатланып яшәгез. Сезгә чын күңелдән сәламәтлек, бәхет һәм уңышлар телим!

Татарстан Республикасы Президенты Р.Н. Миңнеханов

БАРЛЫК ЯҢАЛЫКЛАРНЫ УКУ