Илдар Халиков: "Торак төзелешендә куркынычсызлык һәм сыйфатка игътибар итәргә кирәк"

Агымдагы елның гыйнвар-февраль айларында Татарстанда 438 мең кв метр мәйданда торак сафка бастырылган. Шуның 102 мең кв метры социаль ипотека программасы буенча төзелүче йортларга, 180 мең кв метрдан артыгы - күпфатирлы инвестицияле торак төзелешенә, 154 мең кв метры- шәхси торак төзелеше өлешенә туры килә.

Әлеге мәгълүматлар бүген ТР Хөкүмәт йортында Премьер-министр Илдар Халиков рәислегендә узган республика киңәшмәсендә яңгырады. Видеоконференция режимында оештырылган киңәшмә республикада торак төзелеше һәм торакны сафка бастыру мәсьәләләренә багышланды.

ТР төзелеш, архитектура һәм торак-коммуналь хуҗалык министры Ирек Фәйзуллин сүзләренә караганда, 10 мартка Татарстанда социаль ипотека буенча 1774 фатирга исәпләнгән 38 торак йорт сафка бастырылган. Февраль аена планлаштырылган дүрт йортның барысы да өлгертелгән. Март аена 9 йортны сафка бастыру ниятләнсә, бүгенгә 357 фатирлы сигез йорт кулланылышка тапшырылган. Мәсәлән, Казанда Чистай районында 190 һәм 71 фатирга исәпләнгән ике торак йорт сафка бастырылган. Арчада 3 йорт, Кукмарада 2 торак йорт эксплуатациягә тапшырылган.

“Төзелеш, архитектура һәм торак-коммуналь хуҗалык министрлыгы уздырган мониторингка караганда, быел төзелүче һәм сафка бастырылырга тиешле 87 социаль ипотека объектының 46 сы югары әзерлек дәрәҗәсендә. 13 объектның әзерлек дәрәҗәсе түбән”, - ди Ирек Фәйзуллин. Ул Биектауда төзелүче йортлар буенча графиктан беркадәр калышу булганын искәртеп, ике атна эчендә социаль ипотека объектлары буенча графикка чыгу бурычын куйды.

Бүген республикада Бөек Ватан сугышы ветераннары өчен 155 йорт төзелә. Шуның 137 се Дәүләт инвестиция-төзелеш идарәсе линиясе буенча, 18 йорт ТР Дәүләт торак фонды программалары нигезендә алып барыла. Министр сүзләренә караганда, федераль үзәктән 2011 елның ноябрь траншы алынуга карамастан, 4 муниципалитетта (Әтнә, Яшел Үзән, Казан, Спас) 10 ветеранны тораклы итү буенча әлегә кадәр ахыргача карар кабул ителмәгән. 33 муниципалитетта 252 ветеран фатир сайлау турында килешү имзаламаган. Министр беренчел базардан фатирлар алуга өстенлек бирелергә тиешлегенә игътибар юнәлтте.

Март аенда республикада ветераннар өчен 21 торак йортны файдалануга тапшыру ниятләнә. Шуларның җидесе (шәхси йортлар) март башында тапшырылган инде. Хәзер төп игътибар, министр фикеренчә, йортларны инженерлык коммуникацияләре белән тәэмин итүгә, эчке бизәкләү эшләрен аерым контрольгә алуга бирелергә тиеш.

Күпфатирлы инвестицияле торак төзелешенә килгәндә, бүген 41 йорт югары әзерлектә. Ирек Фәйзуллин сүзләренә караганда, быел 4 муниципалитеттагы проблемалы объектлар буенча эшләрне тәмамлау бурычы куелган.

Гражданнарны авария хәлендәге тораклардан күчерү программасына килгәндә, Торак-коммуналь хуҗалыкны реформалаштыруга ярдәм фондыннан аны финанслау күләме быел 58 млн сумга артып, 533 млн сум тәшкил иткән. Программаны республика казнасыннан финанслау күләме 198 млн сум булачак. Якын арада һәр муниципаль берәмлек буенча заявкаларны тапшыруны тәмамлау бурычы куела.

Премьер-министр Илдар Халиков искәрткәнчә, Татарстанда федераль һәм республика программалары буенча зур күләмдә торак төзелеше алып барыла. “Төзелештә сыйфат мәсьәләсе зур әһәмияткә ия”, - дип ассызыклый Хөкүмәт рәисе. Ул узган елларда социаль ипотека объектларында стеналарны өюдәге авышлыклар, йортларны эчке бизәкләү эшләренең сыйфаты һ.б.буенча шактый дәгъвалар булуын искәртеп, җаваплы затларны бу мәсьәләгә аеруча игътибарлы булырга чакырды, шулай ук куркынычсызлык техникасы нормаларының үтәлешенә зур игътибар бирү зарурлыгын ассызыклады.