Илдар Халиков: “Югары Ослан районы алдында җитди бурычлар тора”

“Югары Ослан районы җитәкчелеге алдында җитди бурычлар тора”, - дип белдерде бүген Татарстан Премьер-министры Илдар Халиков республиканың Югары Ослан муниципаль район Советы утырышында.

Илдар Халиков билгеләп үткәнчә, район башлыгы сайлана торган сессия - дулкынландыргыч һәм тарихи вакыйга. “Районның яңа башлыгы Марат Зыятдинов алдында гына түгел, Югары Ослан муниципаль районында яшәүчеләр алдында да яңа бурычлар тора”, - диде ул.

ТР Хөкүмәте башлыгы Югары Ослан районының кайбер күрсәткечләр буенча (сәнәгый җитештерү индексы, халыкны торак белән тәэмин итү дәрәҗәсе) Татарстан районнары арасында лидерлар рәтендә баруы хакында хәбәр итте. Соңгы 5 елда районның үсеш динамикасы да куандыра. Шул ук вакытта район җитәкчелегенә кайбер моментларга игътибар итәргә кирәк. Илдар Халиковның сүзләренә караганда, соңгы бер елда районда төзелеш эшләре күләме, ваклап сату әйләнеше кимегән, спорт белән шөгыльләнүче кешеләр дә күп түгел. Шулай ук авыл хуҗалыгы тармагындагы хәлне дә яхшыртырга кирәк. “Сезнең мөмкинлекләрегез зур”, - дип сүзен йомгаклады ТР Премьер-министры.

Үз чиратында, районның яңа башлыгы Марат Зыятдинов Татарстанның Югары Ослан районында хәлне яхшырту өчен мөмкин булганның барысын да эшләргә вәгъдә итте. Спорт белән шөгыльләнүче кешеләр санына килгәндә, ул районда заманча спорт комплексының булмавын билгеләп үтте.

Югары Ослан район Советының бүгенге утырышында район башлыгы урынбасарының да исеме билгеле булды. Ул – Сергей Осянин.

Моннан тыш, депутатлар Югары Ослан районы башкарма комитеты җитәкчесе вазифасына конкурс игълан итү өчен тавыш бирде.