Рөстәм Миңнеханов "Татарстан логистикасы" коммерцияле булмаган партнерлык вәкилләре белән очрашты

Квалификацияле кадрлар әзерләү, күчмә составны яңарту, республиканың эре сәнәгать предприятиеләреннән йөк ташуга заказлар алу. Әлеге мәсьәләләр бүген ТР Президенты Рөстәм Миңнехановның “Татарстан логистикасы һәм автомобильләрдә йөк ташу” коммерцияле булмаган партнерлыгы вәкилләре белән очрашуы вакытында күтәрелде. ТР Хөкүмәте йортында узган очрашуда Премьер-министр урынбасары -ТР Министрлар Кабинеты Аппараты җитәкчесе Шамил Гафаров, сәнәгать һәм сәүдә министры Равил Зарипов, мәгариф һәм фән министры Альберт Гыйльметдинов, ТР Инвестицион үсеш агентлыгы җитәкчесе Линар Якупов, ЭЭМ ЮХИДИ идарәсе җитәкчесе Рифкат Миңнеханов һ.б. катнашты.

ТР Президенты үз чыгышында республиканың алга таба икътисади үсешендә транспортның мөһим ролен билгеләп үтте. “Йөк ташуга булган ихтыяҗны гамәлдәге күчмә состав һәм транспортны үстерү программасы белән чагыштырырга кирәк”, -ди республика башлыгы. Рөстәм Миңнеханов 2016 елга республикада җитештерелгән продукция күләмен 2 трлн сумга кадәр җиткерү бурычы куелуын искәртеп, йөк ташуга булган ихтыяҗның сизелерлек артачагына игътибар юнәлтте. “КАМАЗ”, “Казаноргсинтез”, “Түбән Кама нефтехим” җәмгыятьләренең үсеше, “Алабуга” махсус икътисади зонасы мөмкинлекләренең киңәюе нәтиҗәсендә дә йөк ташу күләмнәренең артуы көтелә. Боларның барысы да транспортта йөк ташуга баланслы, системалы якын килүне таләп итә, ди Татарстан Президенты.

Бүгенге очрашу “Татарстан логистикасы һәм автомобильләрдә йөк ташу” партнерлыгы вәкилләре инициативасы белән оештырылды, дип хәбәр итә ТР Президентының матбугат хезмәте. Партнерлык вәкилләре, үз чиратында, республика башлыгына үзләрен борчыган проблемалар хакында җиткереп, аларны чишү юлларын тәкъдим итте. Әлеге оешма җитәкчесе Леонид Штейнберг партнерлыкта 562 әгъза, халыкара һәм шәһәрара маршрутларда эшләүче 3600 берәмлектән артык транспорт чарасы исәпләнүен, тәүлегенә 5 млн тоннадан артык йөк ташылуын хәбәр итте. “Без йөк ташу күләменең артуына йөз тотабыз, моның өчен йөк ташучылар эшчәнлеген координацияләргә кирәк, бу әлеге төр эшчәнлекне лицензияләү бетерелегәннән соң бигрәк тә мөһим”, - ди ул.

Леонид Штейнберг сүзләренә караганда, бүген йөк ташучылар алга куя торган көнүзәк мәсьәләләрнең берсе зур йөк автомобильләре белән идарә итәргә сәләтле квалификацияле яшь кадрлар әзерләүгә бәйле. Бүгенге көндә зур йөк автомобильләре йөртүчеләренең уртача яше 48 тирәсе. Йөк ташучылар вәкилләре фикеренчә, квалификацияле йөртүчеләр юллардагы вазгыятьне яхшыртачак. Леонид Штейнберг махсум программа эшләү тәкъдиме белән дә чыкты. Документ коммерцияле булмаган партнерлык әгъзаларына кредит нигезендә “КАМАЗ”дан, “КАМАЗ” һәм Daimler AG немец концертнының уртак предприятиесеннән техника сатып алу мөмкинлеге бирергә тиеш.

Рөстәм Миңнеханов базар таләпләрен исәпкә алып, ТР Мәгариф һәм фән, Хезмәт, мәшгульлек һәм социаль яклау министрлыкларына зур йөк автомобильләре белән идарә итәрлек йөртүчеләр әзерләү мәсьәләсен өйрәнергә кушты. Моннан тыш, Президент фикеренчә, Транспорт һәм юл хуҗалыгы, Сәнәгать һәм сәүдә министрлыклары “Татарстан логистикасы һәм автомобильләрдә йөк ташу” партнерлыгы белән күчмә составны яңарту, заказлар белән тәэмин итү мәсьәләсендә тагын да тыгызрак хезмәттәшлек итәргә тиеш.

Бүгенге очрашуда шулай ук коммерцияле булмаган партнерлыкның кредитка техника алу буенча банклар белән хезмәттәшлеге хакында да сүз булды.