Рөстәм Миңнеханов министрларга ТР полиция бүлекләрендә видеокүзәтү урнаштыру өчен акча бүлеп бирүне йөкләде

Татарстан Республикасы полициясенең барлык бүлекләрендә видеокүзәтү камералары урнаштырылачак. Бүген Татарстан Республикасы Президенты Рөстәм Миңнеханов шундый карар кабул итте.

Район бүлекләре бүлмәләрендә видеокүзәтү системасы урнаштыру тәкъдиме бүген ТР Эчке эшләр министрлыгы каршындагы иҗтимагый совет утырышында белдерелде. Бу “Дальний” полиция бүлегендәге вәзгыть кабатланмасын өчен кирәк. ТР буенча эчке эшләр министры Әсгат Сәфәров Татарстан Президентына барлык полиция бүлекләрен өстәмә видеокүзәтү камералары белән җиһазлауда ярдәм итүне сорап мөрәҗәгать итте. Искәртеп узабыз, 2011 елдан башлап ЭЭМ бүлекләренең мәҗбүри ябып тоту урыннарында видеокамералар урнаштырылды, әмма хезмәткәрләрнең эш бүлмәләре бүгенге көнгә кадәр җиһазланмаган иде.

Татарстан Президенты Рөстәм Миңнеханов ТР Финанслар министрлыгы белән ТР Мәгълүматлаштыру һәм элемтә министрлыгы җитәкчелегенә полиция бүлекләренең барлык бүлмәләрендә видеокүзәтү системасын урнаштыру өчен акча бүлеп бирү һәм бу эшне башкаруны йөкләде.

Полиция бүлекләрен өстәмә видеотехника белән җиһазлау күп чыгым таләп итә, бу эшләрне федераль казнадан финанслау каралмаган. Шулай итеп, бу мәсьәләне республика акчасы исәбенә генә хәл итү мөмкинлеген искәртеп үтәргә кирәк.