Казанда сәнәгать буенча Координацион советның беренче утырышы узды

РФнең бөтен төбәкләре дә сәнәгать буенча Координация советына керергә тиеш. Бүген Татарстан Президенты Рөстәм Миңнеханов Казанда журналистларга биргән әңгәмәсендә шундый фикер белдерде. Искәртеп узабыз, бүген Казан вертолет заводы базасында сәнәгать буенча Координация советының беренче утырышы узды. Анда РФ сәнәгать һәм сәүдә министры вазыйфаларын башкаручы Денис Мантуров, төбәк сәнәгать министрлары, эре сәнәгать предприятиеләре җитәкчеләре һ.б. рәсми затлар катнашты.

“Узган ел сәнәгать сәясәтен формалаштыручы Россия сәнәгать һәм сәүдә министрлыгы белән РФ субъектлары элемтәләрен камилләштерү һәм координацияләүгә юнәлдерелгән Координация советы оештыру турында карар кабул ителгән иде, - дип билгеләп үтте журналистларга биргән әңгәмәсендә Денис Мантуров. - Бу бергә карарлар кабул итү, субъектлар арасындагы яхшы элемтәләр булдыру, норматив базасын кабул иткәндә дәүләт ярдәме чараларын кабул итү мөмкинлеге бирәчәк. Шулай итеп, Координация советын оештыру сәнәгать сәясәте өлкәсендә дөрес карарлар кабул итәргә ярдәм итәчәк. Гомумән алганда, бу ил икътисады үсешендә уңай чагылыш табачак”.

РФ сәнәгать һәм сәүдә министры вазыйфаларын башкаручы Координация советында катнашучылар санын (әлегә анда РФнең 12 субъекты кергән) арттыру мөмкинлеге хакында: “Элек үк мондый мөмкинлекне чикләмәдек. Хезмәттәшләр активрак катнашыр дип өметләнәм. Әлбәттә, без катнашучылар санын арттырачакбыз, беркем дә чик куймады”.

Рөстәм Миңнеханов Координация советын оештыруга югары бәя бирде. ТР Президенты сүзләренә караганда, еш кына төбәкләр һәм федераль Хөкүмәт бергә шул ук бурычларны хәл итәргә, тәкъдимнәр кертергә этәргеч җитми. “Һәр төбәк үз тормышы белән яши. Еш кына бездә имин булмаган көндәшлек бара, еш кына яңа ысуллар эзлибез, ә алар кайдадыр бар инде”, - дип саный ул.

“Координация советы кирәк, дөрес эш рәвеше алынган. Бөтен төбәкләр дә анда керергә тырышырга тиеш. Координация советы киләчәктә бергә эшләү өчен база бирә”, - дип саный Рөстәм Миңнеханов.

“Бернинди ММЧ аралашуны алыштыра алмый, кешеләр очрашканда уртак карарлар кабул итә”, - дип белдерде Денис Мантуров. Аның сүзләренә караганда, Координация советының чираттагы утырышы апрельдә Свердловски өлкәсендә узачак.