Рөстәм Миңнеханов Кайбыч районында булды

Бүген Кайбыч муниципаль район Советы утырышында муниципалитетның яңа башлыгы расланды. Кайбыч районын 1998 елдан бирле җитәкләгән Җәүдәт Гаффаров урынына моңарчы райондагы авыл хуҗалыгы берләшмәләренең берсен – “Гөбенә” агрофирмасы” ҖЧҖен җитәкләгән Альберт Рәхмәтуллин районның яңа башлыгы итеп сайланды. Җ.Гаффаров үзен район Советы рәисе вазифасыннан азат итүләрен сорады.

Совет урышында ясаган чыгышында, республика башлыгы Җ.Гаффаровка рәхмәт белдерде. Р.Миңнеханов ассызыклап үткәнчә, аның җитәкчелегендә район социаль-икътисади үсештә җитди уңышларга иреште.

Р.Миңнеханов районның төп казанышларын билгеләп үтте. Бу вакыт эчендә 77 мең квадрат метр торак, 8 мәктәп, балалар бакчасы, 41 чакрым озынлыгында яңа юллар, социаль объектлар төзелгән. Шуның белән бергә, республика башлыгы фикеренчә, районда авыл хуҗалыгын, аеруча терлекчелекне активрак үстерергә кирәк. Р.Миңнеханов кече бизнесны үстерү, беренче чиратта, гаилә фермалары төзүне өстенлекле бурычлар рәтенә кертте.

Президент, аерым алганда, районда ветераннар өчен торак төзелеше программасын гамәлгә ашыруга карата тәнкыйть сүзләрен җиткерде. Төзелеш күләмнәре буенча муниципалитетка сораулар булмаса да, файдалануга тапшырыла торган торакның сыйфаты һәрвакытта да тиешле таләпләргә җавап бирми. “Безнең ветераннар өчен “ярымфабрикат” тапшырырга хакыбыз юк”, - дип ассызыклады Р.Миңнеханов.

Республика башлыгы фикеренчә, социаль-икътисади үсеш күрсәткечләре буенча Татарстанның иң яхшы 10 районы арасына керү район омтылырга тиешле төп максат булырга тиеш.

Муниципалитетның яңа башлыгын сайлаулар буенча яшерен тавыш бирү процедурасы алдыннан ясаган чыгышында, А.Рәхмәтуллин райондагы төп тармакны – агросәнәгать комплексын үстерүне җитәкче вазифасындагы беренче чираттагы бурычы итеп билгеләде.

Яңа җитәкче яшерен тавыш бирү юлы белән сайланды. Депутатлар Р.Рәхмәтуллин кандидатурасын бертавыштан хуплады.

ТР Президенты Җ.Гаффаровка “Татарстан Республикасында җирле үзидарәне үстерүдәге хезмәтләре өчен” медален тапшырды.

Муниципаль район Советы утырышы алдыннан Рөстәм Миңнеханов Олы Кайбыч урта мәктәбендә булды, хәзерге вакытта биредә республика программасы кысаларында капиталь ремонт эшләре бара. Мәктәп директоры Илмас Хәмидуллинның сүзләренә караганда, бүгенге көндә мәктәптә райондагы 12 торак пункттан 376 укучы белем ала. Мәктәп 1984 елда төзелгән, хәзерге вакытта биредә бизәкләү эшләре бара, җылылык белән тәэмин итү системасы төзекләндерелә, тәрәзәләр һәм коммуникацияләр алыштырыла. Мәктәпне капиталь ремонтлау проектының смета бәясе 77 миллион сум тәшкил итә. Бүгенге көндә 23 миллион сумга якын акча үзләштерелгән. Директорның сүзләренә караганда, ремонт эшләрен агымдагы елның август урталарында төгәлләү күздә тотыла.

Республиканың Кайбыч районына эш сәфәре барышында ТР Президенты шулай ук “Олимп” спорт-сәламәтләндерү комплексында булды.