Татарстанда "Язгы ташу" оператив республика планына үзгәрешләр кертелде

ТР Гражданнар оборонасы һәм гадәттән тыш хәлләр министрлыгы язгы ташу чорына әзерлек эшләрен узган еллар тәҗрибәсен һәм быелгы гидрометеорологик шартларны истә тотып алып бара. Бу эштә иң заманча технологияләр җәлеп ителә. Алар ярдәмендә, мәсәлән, һәр торак пункт, урам, йорт, анда яшәүче өчен бу чорның ничек узачагын фаразларга ярдәм итүче җентекле карта эшләнә. Шушы һәм язгы ташу белән бәйле гаять җаваплы чорга әзерлек хакында бүген ТР Хөкүмәт йортында узган брифингта журналистларга ТР гражданнар оборонасы һәм гадәттән тыш хәлләр министры урынбасары Николай Суржко сөйләде.
 Аның сүзләренә караганда, бүгенге көндә “Язгы ташу” (“Половодье”) республика оператив планына төзәтмәләр кертелгән, шәһәр-районнарда февраль-апрель айларына планлаштырылган команда-штаб күнекмәләре алып барыла.
 Язгы ташу чорында гадәттән тыш хәлләр чыгу ихтималы өчен, бүген республикада гражданнарны вакытлыча урнаштыру өчен 30 меңгә якын кешене сыйдырырга сәләтле 178 махсус пункт булдырылган. Шулай ук зыян күргән гражданнарны кабул итү өчен хастаханәләрдә 2 меңнән артык койка әзерләнгән. Медицина ярдәме күрсәтү буенча 510 бригада да югары әзерлектә тора. Моннан тыш, 584 берәмлек транспорт әзерләнгән. Муниципаль берәмлекләрнең барысында да язгы ташуга әзерлек паспортлары эшләнгән. Билгеле булганча, аны булдыру зарурлыгы рискларны ачыклап, мөмкин булган гадәттән тыш хәлләрнең йогынтысын киметүгә бәйле.
 Николай Суржко быел елгаларда бозның калынлыгына аерым игътибар юнәлтте. Алда аны шартлату буенча зур эшләр тора. Хәзерге вакытта боз шартлату эшләрен оештыруга әзерлек башкарылган. Министр урынбасары инде кайбер сулыкларда март урталарында бозны кисү эшенә керешүләрен хәбәр итте.
 Бүгенге очрашуда катнашкан кулланучылар хокукларын яклау һәм кеше иминлеге өлкәсендә күзәтчелек буенча федераль хезмәтнең ТР идарәсе җитәкчесе Марина Патяшина исә язгы ташу чорында Татарстан сулыкларында эчәргә яраклы суның пычрануына юл куймаячакбыз, дип ышандырды. Бу чорда сулыкларда су составын тикшерүләр ике тапкырга артачак.