Татарстан Президенты "Мекран" компаниясе презентациясе белән танышты

Бүген Татарстан Президенты Рөстәм Миңнехановка “Мекран” мебель компаниясе продукциясе күргәзмәсен тәкъдим иттеләр.

Экспозиция белән шулай ук ТР төзелеш, архитектура һәм торак-коммуналь хуҗалык министры Ирек Фәйзуллин, республика сәнәгать һәм сәүдә министры Равил Зарипов, Казан мэры Илсур Метшин, Татарстан Инвестицион үсеш агентлыгы җитәкчесе Линар Якупов танышты.

“Мекран” компаниясенең Красноярскида ике мебель фабрикасы, шулай ук үзенең агач әзерләү комплексы бар. Компания бүген Казанда Татарстанның кунакханә базарында катнашучылар өчен семинар-презентация үткәрә, анда кунакханәләрне җиһазландыру өчен үз продукциясен тәкъдим итә.

Семинар башланыр алдыннан Татарстан Президенты Рөстәм Миңнеханов компания продукциясе урын алган күргәзмәне карады. Республика башлыгы җиһазның сыйфатына югары бәя бирде. Р.Миңнеханов фикеренчә, Татарстан базарында тагын бер эре мебель компаниясе барлыкка килү көндәшлеккә ярдәм итәчәк, бу сатып алучыларга файдага булачак.