1 апрельгә Татарстанда ярты миллионнан артык квадрат метр тапшырылачак

 Муниципаль берәмлекләр җитәкчеләре ветераннар өчен төзелүче торакларны файдалануга тапшыруны гына түгел, аларга гражданнарны урнаштыру һәм йортны тиешенчә эксплуатацияләүне дә контрольгә алырга тиеш. Бүген ТР Хөкүмәт йортында Президент Рөстәм Миңнеханов рәислегендә торак төзелеше мәсьәләләренә багышлап уздырылган республика киңәшмәсендә шундый бурыч куелды.
 ТР төзелеш, архитектура һәм торак-комуналь хуҗалык министрының беренче урынбасары Фәрит Хәнифов хәбәр иткәнчә, бүгенге көндә республикада 643 Бөек Ватан сугышы ветераны өчен 158 торак йорт төзелә. 133 йортта төзелеш эшләрен Дәүләт инвестиция-төзелеш идарәсе алып бара, 25 е ТР Дәүләт торак фонды линиясе буенча төзелә. Киңәшмәдә муниципалитетлар башлыкларына 67 йортның 9 майга файдалануга тапшырылып, 234 ветеранның тантаналы шартларда яңа торакларга күчерелергә тиешлеге искәртелде.
 Фәрит Хәнифов сүзләреннән аңлашылганча, март аенда ветераннар өчен 10 йортны файдалануга тапшыру ниятләнә. Ул шул ук вакытта узган елның ноябрендә һәм агымдагы елның гыйнварында федераль транш буенча субсидияләр алган ветераннарның 134 е буенча әлегә кадәр торак шартларын яхшырту формасы билгеләнмәгәнлеген хәбәр итте. Бу проблема 25 муниципаль берәмлекә кагыла. Ә Биектауда исә 2011 елда субсидия алган ветераннарга төзелүче йортта графиктан калышу проблемасы чыккан. ТР Дәүләт торак фонды башкаручы директоры Тәлгать Абдуллин сүзләренә караганда, башта проектлау, аннан экспертиза белән проблемалар чыккан әлеге торак буенча муниципалитет хәзер яңа төзелеш графигы тәкъдим итүен җиткерде.
 Фәрит Хәнифов тагын бер проблемага тукталды. Министрлык, муниципаль берәмлекләр җитәкчеләре урыннарга чыгып оештырган очрашуларда ветеранар өчен төзелгән, файдалануга тапшырылган кайбер торакларда беркемнең дә яшәмәве ачыкланган. “Мондый күренешләр йортларның дөрес эксплуатацияләнмәвенә китерә. Бу ветераннар өчен төзелгән һәм индивидуаль җылыту мичләре урнаштырылган азкатлы йортларда бигрәк тә актуаль. Әгәр фатирда кеше яшәми икән, иминлек ягыннан да , йортта стеналарны җылыту ягыннан да проблемалар чыга”, - ди ул. Киңәшмәдә әлеге йортларга хезмәт күрсәтүче идарә компанияләренә бу йортларны эксплуатацияләү кагыйдәләрен эшләргә, аны һәр фатирда яшәүчегә җиткерү бурычы йөкләнде.