Минтимер Шәймиев Грециягә эшлекле сәфәр кыла

27-28 март көннәрендә ТР Дәүләт Киңәшчесе, ТР тарихи һәм мәдәни һәйкәлләрне яңадан торгызу Республика фондының попечительләр советы рәисе Минтимер Шәймиев Греция Республикасыны Үзәк Македония провинциясенә эшлекле сәфәр кыла.

Сәфәрнең максаты – археология музейлары, тарихи ландшафт, тарихи мирас һәм мәдәни менеджмент объектларын саклау традицияләре һәм тәҗрибәсе белән танышу, археология һәйкәлләрен җимерелүдән саклау, реставрация ясау һәм музейфикация буенча Үзәк Македония белгечләренең уникаль эшчәнлеген өйрәнү.

Бүген Македония башкаласы – Салоники шәһәре аэропортында Татарстан делегациясен Үзәк Македониянең беренче вице-губернаторы Константинос Карапанайотидис, шәһәр төзелеше һәм архитектура һәйкәлләрен саклау буенча ЮНЕСКОның Греция бүлеге мөдире Авраам Касситеридис, “Амботик” туризм концерны президенты Георгий Куртидис, Россия Федерациясенең Салоникидагы Генераль консулы Алексей Попов каршы алды. Делегация Дион археология тыюлыгында, борынгы Стагира шәһәрендә, Вергина шәһәре, Салоникидагы Рим Агорасы, Халкидики ярымутравындагы Олинфос археология музейлары белән танышырга ниятли. Шулай ук Үзәк Македония губернаторы белән очрашу да планлаштырылган.

Минтимер Шәймиевне сәфәрдә ТР Президентының социаль мәсьәләләр буенча ярдәмчесе, ТР тарихи һәм мәдәни һәйкәлләрне яңадан торгызу Республика фондының башкаручы директоры Татьяна Ларионова, ЮНЕСКО эшләре буенча РФ Комиссиясе каршындагы Россия милли бөтендөнья мәдәни һәм табигый мирас комитеты рәисе Игорь Маковецкий, «Татинвестгражданпроект» дәүләт унитар предприятиесе генераль директоры Гадел Хөснетдинов, “Казан Кремле” дәүләт тарихи-архитектура һәм сәнгать музей-тыюлыгы” дәүләт бюджет учреждениесе директоры, Казан федераль университетының Тарих институты директоры Рамил Хәйретдинов, шәһәр төзелеше һәм архитектура һәйкәлләрен саклау буенча ЮНЕСКО Кафедрасының Идел буе бүлеге җитәкчесе Рафаэль Вәлиев озатып йөри.