Илдар Халиков агросәнәгать комплексы үсеше мәсьәләләре буенча РФ Президентының Идел буе федераль округындагы Тулы вәкаләтле вәкил каршындагы Совет утырышында катнаша

ТР Президенты вазифаларын башкаручы–Премьер-министр Илдар Халиков Түбән Новгородта РФ Президентының Идел буе федераль округындагы Вәкаләтле вәкиле каршындагы Совет утырышында катнаша. Идел буе федераль округы төбәкләрендә модернизация шартларында агросәнәгать комплексы үсешенә багышланган утырыш Вәкаләтле вәкил Михаил Бабич рәислегендә уза.

Очрашуда шулай ук ИФО төбәкләре башлыклары, баш федераль инспекторлар, РФ Дәүләт Думасы депутатлары, эре авыл хуҗалыгы берләшмәләре вәкилләре, фәнни җәмәгатьчелек катнаша, дип хәбәр итә ТР Президентының матбугат хезмәте.

Утырышның көн тәртибенә чыгарылган мәсьәләләр авылга ярдәм буенча төбәк һәм федераль программаларның нәтиҗәлелеге, округның агросәнәгать комплексының инвестицияләр җәлеп итү сәләте, авылларның үсеш перспективалары, яшьләрне авыл хуҗалыгы тармагына җәлеп итү белән бәйле. Михаил Бабич белдерүенчә, бүген яшьләрне авыл җиренә җәлеп итү буенча чаралар күрергә кирәк. Аның фикеренчә, яшьләр авылга кайтмаганда, авыл хуҗалыгының үсеш перспективалары булмаячак. Ул агросәнәгать комплексындагы проблемаларның берсе итеп авыл җирләрендә социаль инфраструктура кытлыгын атады.

Авылларда халыкның яшәү дәрәҗәсе социаль-икътисади әһәмияткә генә түгел, сәяси әһәмияткә дә ия. Бүгенге көндә Идел буе федераль округындагы авыл җирлекләрендә 9 млн нан артык кеше яши (округ халкының 30 процентыннан артыграгы).

Белешмә өчен: узган ел Татарстанда 166 млрд сумлык авыл хуҗалыгы продукциясе җитештерелде. Бүгенге көндә Татарстанда 318 мең шәхси хуҗалык, 13 меңнән артык крестьян (фермер) хуҗалыгы исәпләнә. Республикадагы терлекләрнең өчтән бер өлеше аларда асрала, республикада җитештерелүче продукциясенең яртысы диярлек аларда җитештерелә. Гаилә фермаларын үстерү кысаларында, республикада бүген 407 гаилә фермасы төзелгән булса, шуларның 305 е югары технологияле. Киләчәктә гаилә фермалары санын 1 меңгә җиткерү планлаштырыла.