Илдар Халиков һәм "Амботис" туристик концерны президенты Георгий Куртидис туризм өлкәсендә хезмәттәшлек итү мөмкинлеге турында фикер алышты

Бүген Татарстан Республикасы Президенты вазыйфаларын башкаручы – ТР Премьер-министры Илдар Халиков Грециянең “Амботис” туристлык концерны президенты Георгий Куртидис белән очрашуда туристлык һәм мәдәният өлкәсендә хезмәттәшлек итү мөмкинлекләре буенча фикер алыштылар.

Очрашу ТР Хөкүмәт йортында узды. Анда ТР Дәүләт киңәшчесе, ТР Тарих һәм мәдәният һәйкәлләрен торгызу фондының Попечительлек советы Рәисе Минтимер Шәймиев, ТР сәнәгать һәм сәүдә министры Равил Зарипов, ТР мәдәният министры Айрат Сибагатуллин, ТР Президентының социаль мәсьәләләр буенча ярдәмчесе, ТР Тарихи һәм мәдәни һәйкәлләрен торгызу Республика фондының башкаручы директоры Татьяна Ларионова һ.б. катнашты.

Илдар Халиков кунакларны сәламләп, очрашу Үзәк Македониянең танылган археология һәйкәлләрен һәм аларны саклау мәсьәләләрен өйрәнү өчен 27-28 мартта Грециядә булып кайткан Минтимер Шәймиев инициативасы белән оештырылды, дип билгеләп үтте.

“Сез туристлык өлкәсендә эшләү, археология һәм архитектура һәйкәлләрен реставрацияләү һәм музейфикция эшләре буенча зур тәҗрибәгә ия, - диде Илдар Халиков. – Мондый профессиональ элемтәләр Татарстан Республикасы белгечләре өчен файдалы”.

Ул бүген республикада туристлык тармагын үстерүгә, тарих һәм архитектура һәйкәлләрен төзекләндерүгә юнәлдерелгән мөһим проектлар гамәлгә куелуы хакында сөйләде. Барыннан да элек бу киңкүләмле “Мәдәни мирас: Борынгы Болгар шәһәре һәм Зөя утрау-шәһәрчеге” проекты, аның максаты - тарихи һәйкәлләрне саклау, торгызу һәм яшь буынга тапшыру. Моннан тыш, республикада башка архитектура һәм тарих һәйкәлләре бар. Мисал өчен, “Казан Кремле” дәүләт тарихи-архитектура һәм сәнгать музей-тыюлыгы.

ТР Дәүләт киңәшчесе Минтимер Шәймиев Татарстан Республикасы белән Греция хезмәттәшлек итүнең ике якның дә мәнфәгатьләренә туры килүче өлкәләрен таба ала дип белдерде.

Аерым алганда, Илдар Халиков хезмәттәшлек итү өлкәләрен өйрәнергә, бизнес-делегацияләр белән алмаш оештырырга тәкъдим итте. Ул шулай ук республиканы Грециягә самолетлар очыруны оештыру, бигрәк тә туристлык сезонында рейслар санын арттыру кебек мәсьәләләр дә кызыксындыруын билгеләп үтте.

Амботис” туристлык концерны президенты Георгий Куртидис очрашуны оештырганнары өчен рәхмәт белдерде һәм хезмәттәшлек итү белән кызыксынуын белдерде. “Бу очрашу безнең элемтәләрне киңәйтергә мөмкинлек бирер дип өметләнәм, бигрәк тә туристлык, кунаклар кабул итү, шулай ук авыл хуҗалыгы өлкәсендә һ.б.”, - диде ул.

Татарстанның тарих һәм архитектура һәйкәлләрен торгызуга, тарихка хөрмәт белән каравы белгечләрдә соклану уята билгеләп үтте Георгий Куртидис.