Рөстәм Миңнеханов: "Хокук саклау органнары хезмәткәрләренә таләпләрне арттырырга кирәк"

Татарстан җитәкчелеге республиканың хокук саклау органнары системасында проблемалар булуын таный һәм аларны хәл итү өчен ярдәм итәргә әзер. Бүген ТР Президенты Рөстәм Миңнеханов Татарстан Республикасы прокуратурасында эчке эшләр органнары тарафыннан җинаятьчелеккә каршы тору һәм законнарның үтәлешенә күзәтчелек итү эшен оештыруны тикшерү нәтиҗәләренә багышлап үткәрелгән киңәшмәдә әнә шулай дип белдерде.

Киңәшмәне Россия Федерациясе Генераль прокуроры уранбасары Сергей Зайцев үткәрде. Киңәшмәдә шулай ук ТР Дәүләт Советы Рәисе Фәрит Мөхәммәтшин, республиканың хокук саклау структуралары җитәкчеләре катнашты.

Сергей Зайцев үз чыгышында хәбәр иткәнчә, Генераль прокуратура комиссиясе республикада хокук саклау органнары хезмәткәрләре тарафыннан гражданнарга мөнәсәбәттә закон бозу очраклары ачыклангач эшли башлаган. Комиссия әгъзалары Татарстанның күп кенә районнарында булып, гражданнар белән очрашулар үткәргән. “Без бүген киңәшмә рәвешендә күптән борчый торган мәсьәләләрне тикшерергә һәм Татарстан җирендә алга таба мондый хәл кабатланмасын өчен тиешле чаралар күрергә карар кылдык”, - диде Сергей Зайцев.

Сергей Зайцев Генераль прокуратруа комиссиясе үткәргән тикшерү нәтиҗәләренең әһәмиятен билгеләп үтте. “Әлеге киңәшмәдә республика Президентының катнашуы проблеманың кискенлеген һәм Татарстанның барлык хокук саклау органнарының җаваплылыгын тагын бер мәртәбә раслый”, - диде Генераль прокурор урынбасары.

Сергей Зайцев комиссиянең республикада эчке эшләр органнары, тикшерү идарәсе хезмәткәрләре һәм прокурорларның үзләре тарафыннан юл куелган күпсанлы хокук бозу очракларына тап булуын әйтте.

Ул киңәшмәдә катнашучыларны проблемаларны хәл итү юллары хакында фикер алышуда актив катнашырга чакырды. “Сезнең фикерләрегез һәм тәкъдимнәрегез безнең өчен зур әһәмияткә ия. Әзер рецептлар юк, шулай да күпләр алга таба да болай дәвам итә алмавын аңлый”, - дип белдерде Сергей Зайцев.

РФ Генераль прокуратурасының Идел буе федераль округындагы идарәсе башлыгы Вадим Антипов Генераль прокуратура комиссиясенең Татарстандагы эшчәнлеге нәтиҗәләре турында сөйләде.

Татарстан Президенты Рөстәм Миңнеханов республиканың хокук саклау органнарындагы закон бозу очракларын таныды. “Комиссиянең мондый фактларга юлыгуы безнең әлеге мәсьәләгә игътибарны киметүебез хакында сөйли”, - дип белдерде республика башлыгы.

Рөстәм Миңнеханов Генраль прокуратура комиссиясенә һәм Сергей Зайцевка Татарстанда алып барган эшчәнлекләре өчен рәхмәт белдерде. “Хокук саклау органнары хезмәткәрләренә карата дисциплина һәм таләпчәнлекне арттырырга кирәк, - диде Р.Миңнеханов. – Республикабызның хакимият структураларына килгәндә, алар тарафыннан зур ярдәм күрсәтеләчәк”.