Рөстәм Миңнеханов: "Дания белән хезмәттәшлекне арттырырга кирәк"

Татарстанны энергия нәтиҗәлелеге һәм башка өлкәләрдә Дания белән хезмәттәшлек кызыксындыра. Бүген Даниянең сәүдә һәм инвестицияләр министры Пиа Олсен Дюр белән очрашу вакытында ТР Президенты Рөстәм Миңнеханов шулай дип белдерде. Анда РФ икътисади үсеш министры Эльвира Нәбиуллина да катнашты. Очрашу “Алабуга” МИЗында Rockwool компаниясе заводын ачу тантанасыннан соң узды.

Эльвира Нәбиуллина Россия җитәкчелегенең Даниядән инвестицияләр җәлеп итү белән кызыксынуын искәртте. Президент Рөстәм Миңнеханов Пиа Олсен Дюрга республикага сәфәре өчен рәхмәт белдереп, Дания тәҗрибәсенә нигезләнгән энергия, ресурсларны саклау буенча республика програмасының киң кулланылуын искә төшереп үтте. “Без энергия нәтиҗәлелеге буенча сездәге тәҗрибәне кулланып хезмәттәшлек итәргә телибез”, - дип белдерде Рөстәм Миңнеханов.

Республика башлыгы Даниянең сәүдә һәм инвестицияләр министрын Татарстанда ачылган Rockwool компаниясе заводы мөмкинлекләрен республикага Даниянең башка компанияләрен җәлеп итү өчен файдаланырга чакырды. ТР Президенты Дания бизнес-даирәсенең республикага сәфәрен оештыру тәкъдиме белән чыкты. Ул Татарстанның Дания белән мәгариф өлкәсендә хезмәттәшлек итү мөмкинлекләренә дә тукталды. Гомумән алганда, Президент фикеренчә, ике арада хезмәттәшлек өчен перспективалар зур.

Дания министры Пиа Олсен Дюр, үз чиратында, Даниянең кайбер компанияләренең Россиядә производстволарын ачарга әзер булуларын хәбәр итте. “Сезне Даниядә күрүгә шат булачакбыз. Кайбер компанияләребезгә Татарстанга килү кызыклы булыр иде. Шуңа күрә компанияләребезнең республикага сәфәрен оештырачакбыз. Мөнәсәбәтләрнең алга таба дәвам итәчәгенә һәм Татарстанга кабат киләчәгемә ышанам”, - диде министр.