Ханты-Манси автономияле округы губернаторы Наталья Комарова Универсиада авылында булды
Бүген губернатор Наталья Комарова җитәкчелегендә Ханты-Манси автономияле округы – Югра делегациясе Казанга эш сәфәре кысаларында Универсиада авылында булып, андагы яшәү шартлары белән танышты. Рәсми кунакларны ТР Премьер-министры Илдар Халиков, ТР Яшьләр эшләре, спорт һәм туризм министры урынбасары Хәлил Шәйхетдинов, “Казан 2013 Башкарма дирекциясе” оешмасы генераль директоры урынбасары – Универсиада авылы мэры Фәрит Абдулганиев озатып йөрде.
Делегация 17 нче торак йортта булып, Универсиада авылы инфраструктурасы белән танышты. Фәрит Абдулганиев журналистларга алдан ук шәрехләгәнчә, әлеге йорт студентлар төзелеш отряды тарафыннан төзелгән йортларның берсе. Наталья Комарова бер, ике һәм өч урынлы яшәү бүлмәләренә, уку бүлмәсенә, видеозалга, боз генераторына, медицина кабинетына керде, 45 мең урынга исәпләнгән футбол стадионы, шулай ук Универсиада авылы макетларын карады. Фәрит Абдулганиев Бөтендөнья Студент уеннары авылы территориясендә төзелеп килүче Халыкара мәгълүмати үзәкне дә тәкъдир итте, Универсиада тәмамлангач ул Идел буе спорт һәм туризм академиясенең уку корпусына әвереләчәк.
Губернатор Ханты-Манси округының Нижневартовсктан килгән студентлары яшәүче бүлмәләргә дә кереп чыкты. Студентлар исә аңа биредә яшәү шартлары шулкадәр уңайлы булуын билгеләп узды.
Киткәндә, Наталья Комарова изге теләкләрен Мактаулы кунаклар китабына теркәде. “Уңышларыгызга бик шатмын. Киләчәктә дә югары үсеш телим. Сез бик булдыклылар, сезнең дәрәҗәгә омтылырга тырышачакбыз, кадерле дуслар! Юграда очрашуга кадәр!” – губернатор истәлеккә әнә шундый сүзләр язып калдырды.
Фәрит Абдулганиев исә губернаторга бүләккә Универсиада авылы тарихына багышланган китап бүләк итте. “Без бу китапны дәреслек кебек кулланачакбыз. Мондый тормыш “мәктәбе”н узгач, барлык эшләр дә кулыгыздан киләчәк дип ышанам”, - дип белдерде мәртәбәле кунак.
“Уңышларыгызга бик шатмын. Киләчәктә дә югары үсеш телим. Сез бик булдыклылар, сезнең дәрәҗәгә омтылырга тырышачакбыз, кадерле дуслар! Юграда очрашуга кадәр!” – губернатор кунаклар өчен махсус китап битендә истәлеккә әнә шундый сүзләр язып калдырды.
Фәрит Абдулганиев журналистларга билгеләп үткәнчә, бүгенге көндә Универсиада авылында 40 илдән 5893 студент гомер кичерә. Уеннар авылының 1 һәм 2 нче кластерларының 20 йортында инде тулы канлы тормыш бара. 3 нче кластерның тагын 8 йорты файдалануга тапшырылган – бу студентлар өчен тагын өстәмә 4 мең урын дигән сүз. Аларга күченү 1 нче августка көтелә.
“Былтыр Универсиада авылында 272 спорт чарасы үткәрелгән. Без студентларны, начар гадәтләрен оныттырып, актив, сәламәт тормыш рәвешенә җәлеп итәргә омтылабыз. Биредә бию секциясе эшли, күп төрле конкурс һәм концертлар оештырыла”, - ди мэр. Аның әйтүенчә, хәзерге вакытта Универсиада авылы тулай торакны хәтерләтсә, Уеннар чорында ул кунакханә режимын алачак.
Сүз уңаеннан. Универсиада авылы территориясендә куелган стелага караганда, Универсиада башлануга 455 калган.