Татарстан һәм Иран фән һәм мәгариф өлкәсендә мөнәсәбәтләрне үстерүне дәвам итәчәк

Татарстан Республикасы һәм Иран Ислам Республикасы фәнни һәм белем бирү өлкәләрендә мөнәсәбәтләрне үстерүне дәвам итәчәк. Бүген Татарстан Республикасы Президенты Рөстәм Миңнехановның Иран Президенты киңәшчесе, Иран Президентының Инновацион һәм технологик хезмәттәшлек үзәге җитәкчесе Хәмидреза Амириния белән очрашуында сүз әнә шул хакта барды.
Искәртеп узабыз, Иран Ислам Республикасының фәнни даирә вәкилләре делегациясе Казанга эш визиты белән килде. Кичә кунаклар югары технологияләр өлкәсендәге технопарк – ИТ-паркта булды. “Татарстан Республикасы Электрон Хөкүмәте” проекты, шулай ук мәгълүмати технологияләр өлкәсендәге башка проектлар иранлыларда аеруча зур кызыксыну уятты.
ТР Президенты Рөстәм Миңнеханов, Иран Президентының Инновацион һәм технологик хезмәттәшлек үзәге җитәкчесе Хәмидреза Амириния җитәкчелегендәге Иран Ислам Республикасы делегациясен сәламләп, 2011 елның декабрендә Иранга эш сәфәре кысаларында татарстанлыларны җылы кабул иткән өчен Иран җитәкчелегенә рәхмәт белдерде. Ул әлеге сәфәр кысаларында танышкан барлык объектларның да анда яхшы тәэсир калдыруын билгеләп үтте. Иранда сафка бастырылучы геохимия комплексы, шулай ук илдә фән һәм мәгарифнең динамик үсеш кичерүе Татарстан башлыгында аеруча зур тәэсир калдырган. Рөстәм Миңнеханов билгеләп үткәнчә, бүгенге көндә Иранда икътисадны диверсификацияләү процессы бара, нанотехнологияләр, биотехнологияләр, ракета төзелеше һәм башка юнәлешләр үсеш кичерә. Моннан тыш, ил җитәкчелеге галимнәрнең социаль статусын күтәрү, фәнгә инвестицияләр кертүгә зур игътибар бирә. 2006 елда Иранда алдагы унъеллыкка исәпләнгән Нанотехнологияләрне үстерү стратегиясе эшләнде һәм кабул ителде, диде Рөстәм Миңнеханов.
Безгә бер-беребезнең фәнни һәм сәнәгый потенциалыннан файдаланырга, үзара тәҗрибә уртаклашырга кирәк, дип белдерде Рөстәм Миңнеханов. Аның сүзләренә караганда, бүгенге көндә Россия-Иран хезмәттәшлеге кысаларында Татарстан һәм Иран арасындагы мөнәсәбәтләрдә уңай динамика күзәтелә, аны сакларга кирәк. “Без нефть химиясе, фәнни тикшеренүләр, мәгариф өлкәләрендә Иран белән хезмәттәшлек итүгә карата кызыксыну белдерәбез”, - диде Рөстәм Миңнеханов. Моннан тыш, ул Казан һәм Иран арасында туры авиаэлемтә оештыру зур әһәмияткә ия, дип саный.
Рөстәм Миңнеханов май аенда KazanSummit халыкара ислам бизнесы һәм финанслар саммитында катнашу өчен Көнчыгыш Әзербайҗан провинциясе (Иран Ислам Республикасы) җитәкчелегенең Татарстан башкаласына киләчәгенә ышаныч белдерде.
Иран Президентының Инновацион һәм технологик хезмәттәшлек үзәге җитәкчесе Хәмидреза Амириния, үз чиратында, бүгенге көндә ТР Фәннәр академиясе һәм аның президенты Әхмәт Мәзһаров белән актив рәвештә элемтәләр җайга салынуы хакында хәбәр итте. Үзара хезмәттәшлекне нанотехнологияләр, биотехнологияләр, мәгълүмати технологияләр, нефть һәм газ химиясе, сәнәгать җиһазлары юнәлешләре буенча оештыру күздә тотыла.
Хәмидреза Амириния, аерым алганда, бүгенге көндә Завойский исемендәге Казан физика-техника институты үткәрә торган фундаменталь тикшеренүләргә югары бәя бирде.
Ул шулай ук сәнәгать җиһазлары өлкәсендә компрессорлар төзү өлкәсендәге хезмәттәшлекнең әһәмияте зур булуы хакында хәбәр итте.
Рөстәм Миңнеханов һәм Хәмидреза Амириния уртак Фән һәм технологияләр фондын булдыру мөмкинлекләре хакында да фикер алышты. Иран ягы яңа структурага 1 миллион АКШ доллары күләмендә акча кертергә әзер икәнлеген белдерде. Татарстан Президенты Фән һәм технологияләр фондын төзүгә карата ниятләрне раслады.
“Безгә нәтиҗә кирәк, - диде ул. – Фән өлкәсендәге кызыксынуларыбызны берләштерү зарур”.
Хәмидреза Амириния очрашу барышында тагын бер мәртәбә Рөстәм Миңнехановны Иран Ислам Республикасына чакырды һәм Казанда Иран делегациясен җылы кабул иткән өчен рәхмәт белдерде.