Рөстәм Миңнеханов: Казан университеты белән Rikon арасындагы хезмәттәшлек файдалы

Татарстан Президенты Рөстәм Миңнеханов бүген Рикен физик һәм химик тикшеренүләр институты (Япония) президенты, Нобель премиясе лауреаты профессор Рьодзи Нойори белән очрашты.

ТР Хөкүмәт йортында узган очрашуда ТР Президентының Тышкы элемтәләр департаменты директоры - Президентның халыкара мәсьәләләр буенча ярдәмчесе Искәндәр Мөфлиханов, мәгариф һәм фән министры Альберт Гыйльметдинов, Казан (Идел буе) федераль университеты ректоры Илшат Гафуров һ.б. катнашты.

Япониядәге иң эре институтлардан саналган Рикен физик һәм химик тикшеренүләр институты делегациясе Татарстанга 2 май көнне килде. Сәфәрнең төп максаты – КФУ базасында уртак фәнни-лаборатор комплексны ачу иде. Аның рәсми ачылышы Рьодзи һәм КФУ ректоры Илшат Гафуров катнашында үтте.

Казан университеты белән Рикен арасында уртак аспирантурага кагылышлы халыкара программа кысаларында партнерлык килешүе 2008 елда имзаланган иде. Аның максаты - физика өлкәсендә югары квалификацияле белгечләр әзерләү. Фәнни эшчәнлеккә Япония галимнәре дә, Россия галимнәре дә җитәкчелек итәчәк. 2011 елда Казан федераль университеты ректораты утырышында Рикен институты президенты Рьодзи Нойорига “Казан универсиетының шәрәфле докторы” исеме бирү турында карар кабул ителде.

Бүгенге очрашуда Татарстан Президенты Рөстәм Миңнеханов соңгы елларда Казан университеты белән Рикен институты арасындагы хезмәттәшлекнең файдалы һәм нәтиҗәле булуын ассызыклады. Ул бу хезмәттәшлекне стратегик хезмәттәшлек дип бәяли. Уртак фәнни-лаборатор комплексның ачылуын Рөстәм Миңнеханов республиканың фәнни тормышындагы тагын бер күренекле вакыйга дип атады.