Бөек Ватан сугышында Җиңүнең 67 еллыгы уңаеннан Татарстан Республикасы Президенты Р.Н. Миңнеханов мөрәҗәгате

Хөрмәтле ватандашлар! Кадерле сугыш ветераннары һәм тыл хезмәтчәннәре!

Сезне Бөек Ватан сугышында Җиңүнең 67 еллыгы белән чын йөрәктән тәбрик итәм!
1945 елның 9 май көне безнең күпмилләтле Ватаныбыз тарихына мәңгегә кереп калды, ул тиңдәшсез батырлыкларга шатлану һәм авыр югалтуларга әрнүбелән сугарылган. Җиңү көне - сугыштан соңгы барлык буыннарның патриотлык гимны, ул яшь буыннарның күңелендә яңгырый, һәйкәлләрдә, урамнарыбызның һәм мәйданнарыбызның исемнәрендә мәңгеләштерелә. Бу – азатлык, рәхмәтле хәтер һәм югары гражданлык бәйрәме.
Җиңү бәйрәмендә без Ватаныбызның азатлыгы һәм бәйсезлеге хакына башын салган, заводларда һәм колхоз кырларында хезмәт куйган, фашист төрмәләрендә җәзаланган, мохтаҗлыктан, ачлыктан,авыр яралардан вафат булган кешеләрнең һәммәсен исемләп искә алабыз. Бүген чал чәчле ветераннар да, сугыш һәм хезмәт традицияләренең яшь варислары да зур горурлык белән Георгий тасмалары тагып йөри, бу тасмалар илебезне азат итүчеләрнең батырлыгына карата бөтенхалык ихтирамының ачык символы булып тора.
Кансыз һәм мәкерле дошманны җиңү гаять зур корбаннар бәрабәренә яуланды. Татарстанның җиде йөз меңнән артык улы һәм кызы кулларына корал алып газиз Ватанны һәм бөтен дөньяны фашизмнан саклау өчен сугышка китте. Аларның яртысы диярлек туган җиренә кире әйләнеп кайтмады. Муса Җәлил, Михаил Девятаев, Мәгубә Сыртланова, Петр Гаврилов, Гани Сафиуллин, Николай Столяров, Гази Заһитов, Михаил Симонов һәм башка бик күп кыю якташларыбызның батырлыклары хәтеребездән мәңге җуелмас.
Сугыш авырлыкларын һәм сынауларын без бердәм халык, бердәм ил булып кичердек. Сугыш вакыты буынының барлык уй-фикерләре һәм гамәлләре бер максатка юнәлдерелгән иде – бирешмәскә, исән калырга, җиңәргә. Бөек Җиңү каһарманнары үз илләрен, Европаны һәм бөтен планетаны нацистлар коллыгыннан азат итеп үзләренең тарихи миссияләрен лаеклы үтәде.
Еллар үткән саен без ул дәһшәтле чордан ерагая барабыз.Безнең уртак бурычыбыз – бүген исән булган сугыш ветераннарына һәм тыл хезмәтчәннәренә тиешле кадер-хөрмәт күрсәтү, барыбызга да мәгълүм «Беркемдә онытылмый, бер ни дә онытылмый!» дигән лозунгны игелекле гамәлләр белән нигезләү.
Республикада ветераннарның торак һәм башка социаль шартларын яхшыртуга, аларны иҗтимагый тормышка актив катнаштыруга юнәлдерелгән эзлекле курс гамәлгә ашырыла. Россия тарихы елы һәм Татарстан Республикасының тарихи-мәдәни мирасы елы кысаларында үткәрелүче күп кенә юбилейлар һәм истәлекле даталарны бәйрәм итү дә бу игелекле эшкә үз өлешен кертергә тиеш.
Мин ышанам: Бөек Җиңү көне безнең өчен мәңге үзгәрмәс әхлакый кыйбла булып торыр, барлык эшләребезнең һәм кылган гамәлләребезнең дөреслеген алга таба да аңа карап тикшерербез.
Хөрмәтле ветераннарга һәм барлык татарстанлыларга нык сәламәтлек, күтәренке рух, бәхет һәм муллык телим!
Җиңү көне котлы булсын, кадерле дуслар!

Татарстан Республикасы Президенты Р.Н. Миңнеханов