Илдар Халиков “Казаночка” баскетбол командасын котлады

Бүген ТР Хөкүмәт йортында быелгы сезонда Россия чемпионы исемен яулаган “Казаночка” хатын-кызлар баскетбол командасын хөрмәтләделәр. Чара Премьер-министр Илдар Халиков катнашында узды.

“Чын күңелдән сезне һәм республиканы бу җиңү белән котлыйм”, - дип ассызыклады Хөкүмәт башлыгы. Илдар Халиков Татарстанның инде күптән спорт төбәгенә әйләнүен, спорттагы казанышларга ияләнүен искәртеп узды. “Ләкин “Казаночка”ның җиңүе аерым әһәмияткә ия. Ул республикада баскетболның яңарышын символлаштыра. Хәзер Татарстанның төрле төбәкләрендәге кызлар баскетбол белән шөгыльләнергә, чемпион медальләрен тагарга теләр дип уйлым”, - ди Илдар Халиков. Премьер-министр бары яхшы тренерлар командасы булганда гына, уңышка ирешеп булганын ассызыклады.

“Таттелеком” ААҖ генераль директоры, “Казаночка” клубы президенты Лотфулла Шәфигуллин Премьер-министрның фикерен куәтләп, команда җиңүенең спортчыларның, тренерлар составының зур хезмәте нәтиҗәсе булуына игътибар юнәлтте. Ул ТР Хөкүмәтенә командага зур ярдәм итүе өчен рәхмәт белдерде.

Команда исеменнән ТР Президенты һәм Премьер-министры адресына рәхмәт сүзләрен команданың капитаны Светлана Финогентова ирештерде. Илдар Халиков Суперлига җиңүчеләренә яңа автобус ачкычын тапшырды. Лотфулла Шәфигуллин исә Премьер-министрга команда фоторәсеме белән баскетбол тубын бүләк итте.