Рөстәм Миңнеханов "Динамо-Казан" хатын-кыз волейбол командасын Русия чемпионатында җиңүе белән тәбрикләде

Татарстанның волейбол клублары – ир-атларның “Зенит” һәм хатын-кызларның “Динамо” командалары уңышлары нәтиҗәсендә республиканың Россиянең спорт башкаласы буларак имиджы, шулай ук җиңү рухы саклана. Бу хакта бүген Казан Кремлендә Татарстан Президенты Рөстәм Миңнеханов “Динамо-Казан” хатын-кызлар волейбол командасын – ил чемпионкаларын, Чемпионнар лигасының бронза призерларын хөрмәтләү барышында хәбәр итте.

Тантанада шулай ук ТР Дәүләт Советы Рәисе, ТР волейбол федерациясе башлыгы Фәрит Мөхәммәтшин, ТР Яшьләр эшләре, спорт һәм туризм министры Рафис Борһанов, ТР Эчке эшләр министры Артем Хохорин, Казан шәһәре мэры Илсур Метшин, ТР “Динамо” ФСО башлыгы Әсгать Сәфәров һәм башка рәсми затлар катнашты.

ТР Президенты сүзләренә караганда, бүген Җиңү Көне алдыннан күңелле вакыйга – Россиянең ике тапкыр чемпион титулын яулаган спортчыларны, Россия Кубогының көмеш призерларын, Чемпионнар лигасында “бронза” җиңүчеләрне хөрмәтләү. “Ир-атлар һәм хатын-кызларның волейбол командалары мөмкин һәм мөмкин булмаган барлык нәрсәне эшләргә тырыша, - дип ассызыклады Рөстәм Миңнеханов. – Бу волейбол үсеше өчен җавап бирүче Ф. Мөхәммәтшин, Ә. Сәфәров, уенчылар, тренерлар штабы, иганәчеләр казанышы. Сезнең җиңүләр – республикада әлеге спорт төрен алга сөрү өчен яхшы җирлек булып тора”. Татарстан башлыгы Россия җыелма командасына чакырылган Казан волейболчыларына 2012 нче елгы Олимпиадага юллама алуларын һәм Лондонда югары дәрәҗәдә чыгыш ясауларын теләде.

“Сез мөмкин булганның барысын да диярлек җиңдегез инде”, - дип ассызыклады Рөстәм Миңнеханов. – Әмма медицина аппаратурасын 5 миллион сумга яхшырту зарурияте бар. Моны инде үзегездә бар дип саный аласыз. Республика җитәкчелегеннән кирәк булган ярдәмгә сез һәрвакыт исәп тота аласыз. Иң мөһиме – бу күрсәткечтән түбән төшмәскә”.

Тантаналы чыгыштан соң Рөстәм Миңнеханов бүләкләр тапшырды. Клуб директоры Сергей Чернышов “ТР атказанган физик тәрбия хезмәткәре” исеменә лаек булды. ТР Президентының Рәхмәте белән оешма президенты Леонид Барышев, баш тренер Ришат Гыйләҗетдинов (ул шулай ук ТР Президентыннан сәгәть белән дә бүләкләнде), табиб Павел Климовский, “Динамо” ФСО башлыгы Әсгать Сәфәров, шулай ук иганәчеләр һәм берничә уенчы – капитан Мария Борисенко, Екатерина Гамова, Марина Бабешина, Леся Махно һәм башкалар билгеләп үтелде.

Бүген барлык волейболчылар Кремльгә купшы күлмәкләрдән түгел, ә Георгий тасмалары тагылган спорт костюмнарыннан килгәннәр иде.

Җавап сүзендә Мария Борисенко икенче ел рәттән Россия чемпионкалары Кубогының Казанда калуына шат булуын белдерде. Команда капитаны волейболчы гүзәл затларның алга таба да Кубокны Казанда калдыру өчен һәм икенче сезонга Чемпионнар лигасында да җиңү яуларга тырышачакларына ышандырды.

Ришат Гыйләҗетдинов үз чиратында җиңүгә омтылган барлык кешегә рәхмәтен җиткерде. Казан “Динамо”сы остазы республика җитәкчелегенә вакытлы һәм тиз арада күрсәтелгән ярдәм өчен аерым рәхмәтен җиткерде. “Татарстан Казанның чемпионнар шәһәре булуын исбатлый”, - дип ассызыклады ул.

Командадан Рөстәм Миңнехановка бүләккә Россия Чемпионатының алтын медале һәм команданың барлык вәкилләре төшерелгән картина һәм уенчыларның автографлары белән алтынсу йөгертелгән туп тапшырылды.

“Спорт ул шундый тармак, анда һәрвакытта уйланылганнар тормышка ашмый. Кызганычка каршы, хоккейда, футболда безнең позицияләр берникадәр төште. Әмма волейбол ярдәмендә Татарстанның имиджы, җиңү рухы саклана. Сезнең республика имиджында уйнаган ролегез “Татнефть”, “КАМАЗ” ның Татарстан үсешенә керткән өлеше белән тәңгәл”, - дип билгеләп узды Рөстәм Миңнеханов. – Мондый җиңүләрдән башка массакүләм спорт булмаячак. Сезнең уңышлар нәтиҗәсендә Татарстан Россиянең спорт башкаласына әверелде. Уңышның сезгә киләчәктә дә юлдаш булачагына һәм сезнең алга таба яңа уңышлар яулаячагызга ышанам”. Хөрмәтләү истәлеккә фотога төшү белән тәмамланды.

Белешмә өчен. Волейбол Татарстанда популяр спорт төрләренең берсе булып тора. Хәзерге вакытта бу спорт төре белән 42,8 меңнән артык кеше шөгыльләнә, аларның 18,6 меңгә якыны – хатын-кызлар. Республикада волейбол буенча юнәлешләргә ия 39 балалар-үсмерләр спорт мәктәбе исәпләнә. Балалар һәм үсмерләр арасында волейбол белән мавыгучылар 1577 кешене тәшкил итә.

2011-2012 елларда “Динамо-Казан” командасы тренер Р. Гыйләҗетдинов җитәкчелегендә уңышлы чыгыш ясавын дәвам итте. 13 нче апрельдә икенче ел рәттән көчле көндәшлектә алар Россия чемпионатының алтын медальләрен җиңүгә иреште.