Рөстәм Миңнеханов белән Клод-Луи Галльен Универсиада авылында агачлар утыртты

Бүген Татарстан Президенты Универсиада авылы территориясенә эрбет агачы утыртты. Бөтенроссия урман утырту көненә багышланган акциядә FISU президенты Клод-Луи Галльен һәм Красноярски крае губернаторы Лев Кузнецов та катнашты.

Казан (Идел буе) федераль университеты студентлары һәм 2013 елгы Универсиада волонтерлары дәрәҗәле кунакларга агач утыртырга булышты.

Искәртеп узабыз, Красноярски крае губернаторы Лев Кузнецов Казанда зур спорт чараларына әзерлек буенча тәҗрибә туплый. Бүген ул FISU президентына һәм оешманың Башкарма комитетының башка әгъзаларына 2016 елгы Бөтендөнья Универсиадасының потенциаль башкаласы буларак Красноярскиның мөмкинлекләрен тәкъдим итте. 2019 елгы кышкы Унверсиада башкаласы 2013 елда билгеле булачак.

ТР урман хуҗалыгы министры Наил Мәгъдиев сөйләвенчә, Татарстан икенче ел рәттән “Агачлар утырту көне” бөтенроссия акциясендә катнаша.

“Узган ел республикада 2 млн. яшь агач утыртылган, әмма бу җитәрлек түгел. Татарстанда яфраклы агачлар 17,4 процент кына тәшкил итә, ә бу күрсәткечне 50гә җиткерү өчен тырышырга кирәк. Шулай итеп, безгә хезмәт кую өчен җирлек бар”, - диде министр.

Чыннан да, быел акция кысаларында республика буенча 4 млн. агач утыртылган, бу чарада мәктәпкәчә балалар учреждениеләре дә катнашты.

“Яшь эрбет һәм чыршылар үссен өчен йөз ел тирәсе вакыт кирәк. Бу вакытта агач үсеп китәргә һәм кеше кайгыртуын тоярга тиеш. Безгә бу агачларның күләгәсендә утыру насыйп булмаячак, әмма аларны балалар һәм оныклар өчен үстерү зарур”, - диде Наил Мәгъдиев.

Универсиада авылы территориясенә утыртылган 2 дистә эрбет агачын Татарстанга Красноярски крае губернаторы бүләк итеп алып килгән.