Быел “Каравон” кунакларын “Иван Купала” фольклор коллективы сөендерәчәк

Татарстан җирендә узучы “Каравон” рус фольклоры бәйрәме быел юбилеен – 20 еллыгын билгеләп үтә. Шуңа да бу юлы бәйрәм тагын да колачлырак булыр дип көтелә. Быел “Каравон” кунакларны Лаеш районының Русское Никольское авылында 26 май көнне кабул итәчәк. Фольклор бәйрәменең үзенчәлекләре белән бүген ТР Хөкүмәт йортында узган брифингта мәдәният министры урынбасары Ирада Әюпова белән Лаеш муниципаль районының Башкарма комитеты рәисе Михаил Фадеев таныштырды.

Узган елгы “Каравон” үз мәйданына Татарстаннан һәм Россиянең башка төбәкләреннән 120 дән артык коллективны җыйган булса, бүгенгә төбәкләрдәге фольклор коллективларыннан 118 заявка алынган. Михаил Фадеев быелгы бәйрәмдә катнашучылар саны 140 ка кадәр җитәргә мөмкин дигән ышаныч белдерде.

Бәйрәм быел Русское Никольское авылының үзендә узачак. Күбрәк кунаклар кабул итү өчен бәйрәм мәйданнары территориясен киңәйткәннәр. Төп мәйданнан тыш, тагын өч өстәмә мәйданчык эшләячәк.. Аларда чаралар 26 май көнне иртәнге сәгать 10 да башланачак. Ә бәйрәмнең рәсми ачылышы сәгать 11 гә билгеләнгән.

Михаил Фадеев сүзләренә караганда, бәйрәм кунакларны каршылау өчен әзерләнгән театральләштерелгән чарадан башланып китәчәк. Кунаклар өчен быел да осталар шәһәрчеге эшли. Анда 130 га якын оста декоратив-гамәли сәнгать, халык һөнәрчелеге эшләнмәләрен тәкъдим итәчәк. Узган ел гына ишекләрен ачкан “Каравон” тарихы музее да экспозициясенең байлыгы белән сөендерәчәк.

Фольклорның кереш өлеше быел кунакларның хәтерендә ярәшү, өйләнү йоласына багышланган театральләштерелгән чара белән истә калачак. Рәсми чыгышлар, концерт программасыннан соң, кичке дүртләр тирәсендә “Каравон”ның “йөзек кашы” әйлән-бәйлән башлана.

Быелгы рус фольклоры фестиваленең төп кунаклары – Санкт-Петербургтан “Иван Купала” коллективы булачак. Бәйрәм чаралары кичке сәгать 5 кә кадәр дәвам итәр дип планлаштырылган. Русское Никольскоедагы быелгы юбилей фестивале хакында “Беренче канал”да экраннарга чыгучы “Играй, гармонь!” программасы сөйләячәк. Бәйрәмдә аларның махсус төшерү төркеме эшләячәк.

Фестивальне тамаша кылырга җыенган казанлылар өчен башкаладан беренче автобус иртәнге тугызынчы яртыда ук кузгалачак. Алар Камал театры, “Корстон” үзәге, Химиклар, Ленин исемендәге мәдәният сарайлары яныннан, Петров паркы, Кол Гали, Җиңү Проспекты, Ваһапов тукталышларыннан китәчәк.

Министр урынбасары Ирада Әюпова ассызыклаганча, бәйрәмне тиешле дәрәҗәдә уздыру өчен барысы да эшләнгән. Бары 26 майда матур һава торышы булуын теләргә генә кала.