Төрекмәнстан делегациясе ТР Түбән Кама һәм Алабуга районнарындагы предприятиеләрдә булды

Бүген Төркмәнстан делегациясе ТР Алабуга районында булды. Делегация составында сәүдә һәм тышкы икътисади элемтәләр министры Баяр Абаев, икътисад һәм үсеш министры Бяшиммурад Ходжамеммедов, коммуналь хуҗалык министры Арслан Ягшимаммедов бар.

Аларны “Алабуга” махсус икътисади зонасында ТР Премьер-министры Илдар Халиков, сәүдә һәм сәнәгать министры Равил Зарипов, Алабуга районы башлыгы Геннадий Емельянов каршы алды.

Кунакларга “Алабуга” махсус икътисади зонасын тәкъдим иттеләр, икътисади зонада резидентларга тәкъдим ителә торган мөмкинлекләр һәм өстенлекләр турында сөйләделәр. Алар шулай ук “Форд-Соллерс”та булды.

Аннары кунакларга “ЕлАЗ җитештерү берләшмәсе” ААҖ күргәзмәсен тәкъдим иттеләр. Биредә нефть, газ сәнәгате өчен махсус техника, автофургоннар, “Беларусь” һәм “Чукуров” тракторлары кебек юлларны ремонтлап һәм карап тоту өчен махсус техника, һәм коммуналь техникалар куелган. Сүз уңаена, “ЕлАЗ җитештерү берләшмәсе” “Чукуров” тракторларын Төркия компаниясе белән килешү нигезендә җитештерә.

Алабуга автозаводы җитәкчелеге фикеренә караганда, соңгы елларда Төркмәнстанда төзелеш эшләре актив баруын исәпкә алсак, бу техника бүгенге кунакларга кызыклы булырга мөмкин. Ә “ЕЛАЗ” хезмәттәшлек итәргә әзер.

Төркмәнстан рәсми делегациясенең Түбән Камага визиты “ТАНЕКО” нефть эшкәртү комплексында дәвам итте. Кунакларны ТР Премьер-министры Илдар Халиков һәм ТР энергетика министры Илшат Фәрдиев озатып йөрде.

“ТАНЕКО” ААҖ генераль директоры Хәмзә Баһманов кунакларга 2010 елның октябрендә РФ Президенты Дмитрий Медведев төймәгә басып заводны эшләтеп җибәрде дип сөйләде. Кунакларга сәнәгать мәйданчыгында нефть эшкәртү заводының төп җитештерү объектларын, аерым алганда, бер елда 7 млн. тоннага кадәр нефтьне беренчел эшкәртүгә ия “ЭЛОУ-АВТ-7” корылмасын тәкъдим иттеләр.

Экскурсия вакытында Төркмәнстан делегациясе әгъзаларына комплекс белән идарә итә торган уникаль автоматлаштырылган система хакында сөйләделәр.

Төркмәнстан җитәкчелеге “ТАНЕКО” компаниясе белән очраклы рәвештә генә кызыксынмый: “Татнефть”ААҖ белән “Туркменнебит” дәүләт концерны арасындагы мөнәсәбәтләр күптән җайга салынган.