Рөстәм Миңнеханов янә “Татнефтехиминвест-холдинг” Директорлар советы рәисе итеп сайланды

Татарстан Республикасы Президенты Рөстәм Миңнеханов җитәкчелегендә узган “Татнефтехиминвест-холдинг” ААҖ акционерларының еллык җыелышында 2011 елда җәмгыятьнең эше канәгатьләнерлек дип танылды. Холдинг системалы рәвештә эшләвен дәвам итә, диде Р.Миңнеханов.

2011 елның 1,69 млрд. сум күләмендә чиста керемен АҖ үсешенә юнәлдерү карары кабул ителгән. Керемнең кинәт үсүе холдиг балансындагы Татарстан компаниясе акцияләре бәясе үзгәрүгә бәйле. Реаль керем 32 млн. сум тәшкил иткән. Узган еллардагы кебек дивидентлар күчермәү турында карар кабул ителгән.

Акционерлар “Татнефтехиминвест-холдинг”ның “Кама инновацион территориаль-производство кластеры” коммерцияле булмаган партнерлыгында катнашуын хуплады. Рөстәм Миңнеханов аңлатып узганча, Татарстанда үзара бәйле булган Чаллы, Түбән Кама мәйданчыклары һәм “Алабуга” МИЗ актив үсеш ала. Стратегик үсеш алу өчен кластер алымын исәпкә алу зарур, бу инфраструктура һәм социаль мәсьәләләр буенча федераль ярдәм җәлеп итү мөмкинлеге бирә.

“Татнефтехиминвест-холдинг”ның 22 кешедән торган яңа Директорлар советы сайланды. Анда ТР Президенты Рөстәм Миңнеханов, Татарстан Премьер-министры Илдар Халиков, ТР Премьер-министрының беренче урынбасары Равил Моратов, ТР сәнәгать һәм сәүдә министры Равил Зарипов, ТР икътисад министры Мидхәт Шаһиәхмәтов, ТР Президенты ярдәмчесе Ренат Сабиров, ТР Президентының нефть һәм нефть-газ урыннарын эшкәртү мәсьәләләре буенча киңәшчесе Ренат Мөслимов, ТР Премьер-министрының нефть, газ, химия комплексы мәсьәләләре буенча ярдәмчесе Алмаз Галиев керде.

Республиканың әйдәп баручы компанияләре җитәкчеләре: “Связьинвестнефтехим” ААҖ дәүләт холдингы генераль директоры Валерий Сорокин, “Татнефть” ААҖ генераль директоры Шәфәгать Тәхаутдинов, аның беренче урынбасары Наил Маганов, “ТАИФ” ААҖ генераль директоры Альберт Шиһабетдинов, “Түбән Кама Нефтехим” ААҖ генераль директоры Владимир Бусыгин, “Казаньоргсинтез” генераль директоры Леонид Алехин, “Нәфис-Косметикс” ААҖ генераль директоры Дмитрий Хәйбуллин, “Татнефтепродукт” ААҖ генераль директоры Рөстәм Сабиров, “Татнефтехиминвест-холдинг” генераль директоры Рафинат Яруллин, “Ак Барс” банкы идарәсе рәисе Роберт Миңнегалиев, “Химград” ААҖ Директорлар советы рәисе Альберт Кәримов, “Алабуга МИЗ” ААҖ генераль директоры Тимур Шаһивәлиев элеккечә Директорлар советы әгъзалары булып кала. Илшат Фәрдиев тә янә совет әгъзасы булды, әмма бу юлы “Сетевая компания” ААҖ генераль директоры вазыйфасында.

ТР Инвестицион үсеш агентлыгы җитәкчесе Линар Якупов Директорлар советының яңа әгъзасы итеп сайланды. Советтан “Түбән Кама шин” ААҖ нең элеккеге генераль директоры Радик Ильясов чыкты, ул РФ Дәүләт Думасы депутаты итеп сайланган иде.

Директорлар советының җыелыштан соң узган беренче утырышында Рөстәм Миңнеханов янә рәис итеп сайланды. Холдинг генераль директоры Рафинат Яруллин вазыйфасында калды, аны ТР Президенты инновацион идеяләр генераторы дип атады.