Россия Монополиягә каршы федераль хезмәтенең Казандагы уку-методик үзәге сентябрьдә ачылачак

Бүген Татарстанның Министрлар Кабинетында, Казанда Россия Монополиягә каршы федераль хезмәтенең уку-методик үзәге эшен оештыру мәсьәләсе буенча киңәшмә узды. Аның эшендә ТР Премьер-министрының беренче урынбасары Равил Моратов, Статс-секретарь, РФ Монополиягә каршы хезмәт җитәкчесе урынбасары Андрей Цариковский катнашты.

Киңәшмә тәмамлангач, рәсми затлар журналистлар белән үзәк ачылышы буенча үз фикерләре белән уртаклашты.

“Бу үзәк эшен оештыруны без әһәмиятле эш дип саныйбыз, Президент Рөстәм Миңнеханов республика Хөкүмәте җитәкчелегенә дә бу эштә актив катнашырга, мөмкинлекләр тудырырга, ярдәм итәргә йөкләмә бирде. Әлбәттә, моңа өстәмә акчалар да бүленеп бирелде, чөнки анда безнең вәкилләр укыячак, бу үзәк Татарстан өчен дә хезмәт итәчәк. Россия дәрәҗәсендә гамәлгә ашырылучы бу проектка мөнәсәбәтебез уңай, киләчәктә университетлардан да студентлар җәлеп ителәчәк”, - дип белдерде Равил Моратов.

Андрей Цариковский билгеләп үткәнчә, ел дәвамында үзәктә күләмле эшләр башкарылган. “Иртән без объектта югары дәрәҗәдәге әзерлекне күрдек. Бу безгә план буенча көздән дәресләр башларга мөмкинлек бирә, үзәкнең ачылышы сентябрьдә көтелә. Беренче итеп, сынау рәвешендә без анда үзебезнең хезмәткәрләрне кабул итәчәкбез”, - дип хәбәр итте федераль монополиягә каршы хезмәт җитәкчесе урынбасары.

Әйтергә кирәк, булачак үзәк монополиягә каршы закон, заказларны тарату тутындагы закон, реклама законы өлкәләрендә квалификацияле белгечләр әзерләү максатын күзаллый. Үзәк мәйданында уку дәресләреннән тыш, Россия һәм БДБ илләренең монополиягә каршы законнарын якынайтуга юнәлдерелгән халыкара дәрәҗәдәге конференция, семинарлар, киңәшмәләр үткәреләчәк.

Монополиягә каршы федераль хезмәт һәм Татарстан Хөкүмәте арасында Казанда уку-методик үзәге ачылышы турындагы килешү статс-секретарь, федераль хезмәт җитәкчесе урынбасары Андрей Цариковский һәм ТР Премьер-министры Илдар Халиков арасында 2010 елның 3 нче сентябрендә имзаланган. Үзәк төзелеше турында РФ Хөкүмәте Карары 2011 елның 28 июлендә дөнья күрә.