Татарстанда 2011 елда балалар арасында 27 суицид очрагы теркәлгән

1 нче июнь – Халыкара балаларны яклау көне. Шул уңайдан бүген Татарстан Министрлар Кабинетында барлык муниципаль берәмлекләр белән видеоконференция режимында брифинг узды. Брифингта катнашучылар балалар һәм үсмерләргә кагылышлы җитди проблемаларны яктыртырга тырышты.

Республиканың бала хокуклары буенча вәкиле Гүзәл Удачина бала хокулары һәм мәнфәгатьләре үтәлеше буенча 2010 һәм 2011 елдагы эшчәнлек буенча әзерләнгән докладыннан өземтәләр тәкъдим итте. 2011 ел йомгакларына күз салсак, Татарстанда 723 мең бала яши, бу барлык халыкның 19 процентын тәшкил итә. Былтыр бала хокуклары бозылу буенча 643 мөрәҗәгать кабул ителгән. Агымдагы елның 5 ае эчендә хезмәт тарафыннан 402 шикаять каралган.

Гүзәл Удачина хәбәр иткәнчә, соңгы 5 елда балалар туу күрсәткече 36,70 процентка арткан. Былтыр 50824 бала якты дөньяга аваз салган, бу алдагы ел белән чагыштырганда, 2 мең 33 балага күбрәк. “Балалар, бигрәк тә яңа туган нарасыйлар үлеме күрсәткечләре кимүе куандыра, 2010 ел белән чагыштырганда, ул 11,9 процентка кимрәк”, - ди ул.

Кызганычка каршы, былтыр 512 бала вафат булган (чагыштыру өчен: 2010 елда ул 525 баланы тәшкил итә). Гүзәл Удачина сүзләренә караганда, узган ел йомгаклары буенча, 380 баланың төрле авырулар аркасында, 81 баланың бәхетсезлек очраклары нәтиҗәсендә гомере өзелгән, 27 бала үз-үзенә кул салган, 13 сабый кисәк үлем синдромы нәтиҗәсендә вафат булган, 11 бала җинаять гамәлләре нәтиҗәләрендә үтерелгән.

“Юл-транспорт һәлакәтләрендә, янгыннарда теркәлгән балалар үлеме, суицид очраклары бигрәк аяныч”, - дип ассызыклый бала хокуклары буенча уполномоченный. Ул хәбәр иткәнчә, соңгы 3 елда балаларның үз-үзенә кул салу очраклары 35 процентка “үсеш” кичерә. Хәзер бу проблема чаң сугарлык дәрәҗәгә җитте. Агымдагы елның 5 ае эчендә 13 суицид теркәлгән. Аларның яртысының диярлек сәбәпләре төгәл ачыкланмый. Кызганычка каршы, балалар һәм үсмерләрне көчләү сыйфатындагы җинаятьләр дә арта, былтыр мондый 1200 җинаять теркәлгән. 16 яше тулмаган балалар һәм үсмерләрнең җенси кагылсызлыгына каршы җинаятьләр саны 3,8 тапкыр арткан: 2011 нче елда барлыгы 626 җинаять ачыкланган. Былтыр 98 бала көчләүчеләрнең корбаны булган, аларның 34е якыннары – гаилә әгъзаларыннан зыян күргән. “Мондый җинаятьләрне ачыклау бик катлаулы. Иминлеге какшаган гаиләләр даими контроль астында булса да, кызганыч ки, уңышлы, бер органда да учетта тормаган гаиләләрдә дә мондый җинаятьләргә урын бирелә башлады. Күп очракта балалар якыннарының, үги аталарының бу адымнарының законсыз булуын аңламый, шуңа күрә зарланырга кирәклеген башына да китерми”, - дип саный Гүзәл Удачина.