Татарстан Республикасы Хөкүмәте

Беренче сменада ТР муниципаль районнарында 636 мәктәп яны лагере эшләячәк

2012 елның 29 мае, сишәмбе

1 нче июнь – Халыкара балаларны яклау көне. Шул уңайдан бүген Татарстан Министрлар Кабинетында барлык муниципаль берәмлекләр белән видеоконференция режимында брифинг узды. Брифингта катнашучылар балалар һәм үсмерләргә кагылышлы җитди проблемаларны яктыртырга тырышты. ТР Бала хокулары буенча вәкиле Гүзәл Удачина җәйге каникуллар якынлашу белән бәйле рәвештә, ата-аналарга үз балаларының хокуклары һәм мәнфәгатьләре тиешле рәвештә үтәлүен кайгыртып, аларга уяулыкларын арттырырга киңәш итте. Моннан тыш, җәйге чорда балалар кайда гына ял итмәсен, төп яклаучы һәм саклаучы ата-ана булуын искәртте. 1 нче июньнән җәйге сәламәтләндерү кампаниясе старт ала.
Билгеле булганча, быел җәй дәвамында республика территориясендә 54 муниципаль шәһәрдән читтәге стационар сәламәтләндерү лагере, предприятие һәм оешмаларның 37 шәһәрдән читтә урнашкан балалар сәламәтләндерү, 18 республика стационар балалар сәламәтләндерү лагере (шул исәптән, берсе Краснодар крае территориясендә), югары уку йортларының 8 федераль стационар сәламәтләндерү лагере һәм 17 санаторий - барлыгы 137 оешма балаларны каршы алырга әзерләнә. Аларда 200 меңнән артык Татарстан баласы ял итәчәк. Бу балалар һәм үсмерләр белән 17 мең педагог һәм вожатый шөгыльләнәчәк. Бу хакта ТР Яшьләр эшләре, спорт һәм туризм министры урынбасары Андрей Кондратьев хәбәр итте.
“ТР Хөкүмәте тарафыннан балаларны яклау, аларның тормыш сыйфатын яхшырту юнәлешендә мөмкин булган барлык эшләр дә башкарыла. Минемчә, “Созвездие-Йолдызлык” фестивале балаларның үсеше өчен җитди тырышлык куя: ел саен ул республика буенча 90 мең баланы үзенә җәлеп итә”, - дип, Андрей Кондратьев 1 нче июнь көнне министрлыкның үз ихтыяры белән балалар күңелен ачарга теләгән оешмалар белән берлектә эшләячәген хәбәр итте.
ТР Мәгариф һәм фән министры Айрат Зиннуров хәбәр иткәнчә, Татарстанның 23 районында җәйге ялның беренче сменасында 636 мәктәп яны лагере үз эшен башлап җибәрәчәк.
Брифингта күтәрелгән проблемаларның тагын берсе – психолог ярдәмен үтемле итү. Бу бигрәк тә, төшенкелеккә бирелгән, вәхшилек корбаны булган һәм үз-үзенә кул салу уен башына керткән балалар һәм үсмерләргә кагыла. Гүзәл Удачина ассызыклап узганча, һәр белем бирү учреждениесенең үз психологы булырга тиеш. Республикада алар 1800 дән артык. Ләкин бүгенге көндә Татарстанда бары тик 399 гомуми белем бирү учреждениесе генә психолог белгеченә ия.
Аның сүзләренә караганда, 17 нче май көнне Халыкара балалар өчен ышаныч телефоны көне билгеләп үтелгән, әмма бу көннең роле, аның фикеренчә, әлегә тиешенчә бәяләнми. Гүзәл Удачина искәртеп үткәнчә, 88002000122 бөтенроссия балалар өчен ышаныч телефонына аноним төстә шалтыратып, психолог белән киңәшергә мөмкин. “Татарстан территориясендә балалар өчен берничә ышаныч телефоны бар. “Минем карашка, балаларга уңайлы булсын өчен бер телефон номерын булдыру зарур”, - дип белдерде Гүзәл Удачина.

ТР Президенты матбугат хезмәте

БАРЛЫК ЯҢАЛЫКЛАРНЫ УКУ