Зөя шәһәр утравында торгызылган Ат утары комплексы ачылды

Бүген Зөя утрау-шәһәрчегендә “Ат утары” комплексы ачылды. Ат утарында Татарстан Президенты Рөстәм Миңнеханов, ТР Дәүләт киңәшчесе, “Яңарыш” республика фондының попечительлек советы рәисе Минтимер Шәймиев, республика Премьер-министры Илдар Халиков һ.б. рәсми затлар кунак булды.

Богородице-Успенский ир-атлар монастыренең “Ат утары” XVI гасырның икенче яртысында төзелгән булган. Хәзерге вакытта “Татарстан мәдәни мирасы: борынгы Болгар шәһәре һәм Зөя утрау-шәһәрчеге” комплекслы проектын гамәлгә кую кысаларында “Яңарыш” фонды хәйриячеләре ярдәме белән Ат утары торгызылган һәм туристлык комплексы буларак җайлаштырылган.

Хәзер Ат утарында остаханәләр, ресторан һәм ике номерлы кунаклар йорты, сувенирлар сату урыны, 5 атка исәпләнгән ат абзары бар.

Рөстәм Миңнеханов белән Минтимер Шәймиев яңа ясалган чүлмәкләрдә имзаларын калдырды. ТР Президенты тимерче палаткасы янында тукталды һәм дагага “2012” тамгасын куйды. Республика башлыгына бүләккә кулдан эшләнгән ат дагасы һәм курчак, күннән ясалган бөти бүләк ителде.

Ат утарын ачу тантанасында Рөстәм Миңнеханов сәламләү сүзе белән чыгыш ясады. ТР Президенты сүзләренә караганда, ай саен Болгарда һәм Зөядә яңа объектлар ачыла. “Ат утары – безнең тарих, мәдәният. Биредә кунаклар һәм балалар өчен барысы да дөрес һәм танып белү өчен ясалган, - дип ассызыклады ТР Президенты. – Балалар безнең тарихны, традицияләрне һәм гореф-гадәтләрне белергә тиеш. Биредә барысы да бер урында уңышлы тупланган”. Республика башлыгы М.Шәймиевка, төзүчеләргә һәм хәйриячеләргә бу проектны югары сыйфатлы итеп гамәлгә куюлары өчен рәхмәт белдерде.

Минтимер Шәймиев, үз чиратында, экскурсияләр оештыру буенча җаваплы вакыт җитте дип билгеләп үтте.

“Тиздән 2013 ел Универсиадасы кунакларын кабул итәбез. Туристлар өчен тарихи объектларда булу мөмкинлеге тудыру зарур”, - дип белдерде М.Шәймиев туристлык оешмалары вәкилләренә мөрәҗәгать итеп.

Тантаналы чыгышлардан соң Хәйриячеләр китаплары һәм “Яңарыш” фонды Рәхмәт хатлары тапшырылды.