РФ авыл хуҗалыгы министры Николай Фёдоров Казандагы Агросәнәгать паркы проекты белән танышты

Бүген Россиянең авыл хуҗалыгы министры Николай Федоровка Казанда булачак Агропромпаркны тәкъдир иттеләр. Чарада Татарстан Премьер-министры Илдар Халиков, ТР Премьер-министр урынбасары – авыл хуҗалыгы һәм азык-төлек министры Марат Әхмәтов катнашты.

Проектны ТР Төп инвестицион-төзелеш идарәсе җитәкчесе урынбасары Олег Власов тәкъдир итте.

Яңа объектны төзү эшләре ипподром янында, Аграр һәм Җиңү урамнары киселешендә алып барыла. ТР Авыл хуҗалыгы һәм азык-төлек министрлыгы зур өметләр баглаган Агропромпарк 8 гектар мәйданны биләп торачак.

О.Власов гомуми 50 мең кв.м мәйданда төрле корылмалар урнашкан Агропромпарк фермерлар һәм шәхси хуҗалыклар өчен продукцияләрен сатарга уңайлы урын булачак, дип саный. Агропромпарк территориясендә сәүдә урыннары, складлар, эшкәртү зоналары, кунакханә, кафе, офис урыннары һәм башкалар урнашачак.

Шулай итеп, авыл хуҗалыгы җитештерүчеләренә үзләре өчен кулай булган бәядән авыл хуҗалыгы продукцияләрен сатарга, ә шәһәр халкына – кыйммәт булмаган, экологик чиста, республикада җитештерелгән продуктлар алырга мөмкинлек туачак.

Николай Федоров Казанда авыл хуҗалыгы продукцияләре сатылучы башка урыннар булу-булмау турында кызыксынды.

Татарстан Хөкүмәте башлыгы хәбәр итүенчә, бер мәйданда авыл хуҗалыгы продукцияләрен саклау, эшкәртү, сату шартлары тудырылган урыннар моңарчы булмаган. Фермер хуҗалыклары үз продукцияләрен базарларда сата ала иде.

Илдар Халиков сүзләренә караганда, бу проект авыл хуҗалыгы җитештерүчеләре продукциясен сату проблемасына җавап кебек булды.
Шулай ук федераль министр проектның бәясе белән дә кызыксынды. Олег Власов хәбәр итүенчә, Агропромпаркны булдыру проекты якынча 1,7 миллиард сум тора. 1 миллиард сумнан бераз артыгын федераль үзәк бирә, 700 миллионга якынын – Татарстан.

“Бу – искиткеч проект. Сез уңышка ирешәчәксез”, - диде Россия авыл хуҗалыгы министры Николай Федоров.