Рөстәм Миңнеханов БСО гендиректоры белән очрашты

Бүген Татарстан Президенты Рөстәм Миңнеханов Бөтендөнья сәүдә оешмасы генераль директоры Паскаль Лами белән очрашты. Шулай ук Казан Кремлендә үткән бу очрашуда ТР Президенты Тышкы элемтәләр департаменты директоры – ТР Президенты ярдәмчесе Искәндәр Мөфлиханов, вице-премьер – республиканың сәнәгать һәм сәүдә министры Равил Зарипов, вице-премьер – Татарстан авыл хуҗалыгы һәм азык-төлек министры Марат Әхмәтов, ТР Сәүдә-сәнәгать палатасы рәисе Шамил Агеев катнашты.

Паскаль Лами Казанда АТЭС форумы чараларында катнаша. Татарстан Президенты Рөстәм Миңнеханов очрашуны ачканда, АТЭС форумы кысаларында Казанга килгәне өчен, Бөтендөнья сәүдә оешмасы башлыгына рәхмәтен белдерде.

Рөстәм Миңнеханов хәзерге вакытта Россиянең Бөтендөнья сәүдә оешмасына керүнең соңгы этабында торуын билгеләде. Рөстәм Миңнеханов фикеренчә, Россия дөнья икътисадына кертелергә тиеш, монда Бөтендөнья сәүдә оешмасының роле бик зур. “Мин Россия, Бөтендөнья сәүдә оешмасына кереп, бик күп өстенлекләргә ия булачагына өметләнәм. Ләкин бу шул ук вакытта бик күп җаваплылыкны сорый, - дип саный Татарстан Президенты. - Бөтендөнья сәүдә оешмасына керү безгә өстәмә таләпләр йөкли, һәм без бу процесска әзер булырга тиеш”.

Рөстәм Миңнеханов сүзләренә караганда, Бөтендөнья сәүдә оешмасына керү мәсьәләләре республика җитәкчелеге тарафыннан сөйләшенде һәм сөйләшенәчәк. “Татарстан икътисадының 50 проценты экспортка ориентлаштырылган. Һәм бу без яңа базарлар эзләргә тиеш булуны аңлата. Ләкин безнең кайбер тармакларны дөнья базарларында конкурентлаша алсын өчен яңартырга кирәк”, - дип ассызыклады Татарстан башлыгы.

ТР Президенты билгеләвенчә, Россиянең Бөтендөнья сәүдә оешмасына керүе алдыннан республикага агросәнәгать секторының конкурентлашу мөмкинлеген арттыруга, шулай ук кайбер машина төзү секторы предприятиеләрен яңартуга көч салырга кирәк.

Бөтендөнья сәүдә оешмасы генераль директоры Паскаль Лами үз фикерен әйтеп, Россиягә Бөтендөнья сәүдә оешмасына керү зыян китермәячәген, белдерде. “Мин җитәкче булган вакытта Бөтендөнья сәүдә оешмасына 15 ил керде, һәм ахыр чиктә бу берсендә дә канәгатьсезлек тудырмады”, - дип билгеләде Паскаль Лами. Бөтендөнья сәүдә оешмасы башлыгы фикеренчә, Россия өчен законнарның һәм кагыйдәләрнең ачыклыгын тәэмин итү иң зур каршылык булачак, ләкин нәкъ менә шул ил икътисадына турыдан-туры чит ил инвестицияләре керүен арттырырга тиеш.

Паскаль Лами Татарстан Президентыннан республиканың чит ил инвестицияләрен җәлеп итүдә тәҗрибәсе белән кызыксынды. Рөстәм Миңнеханов Татарстанда тормышка ашырылган һәм ашырыла торган чит ил проектлары турында сөйләде. “Без инвестицияләрне даимилек һәм ачыклык кына җәлеп итәчәген аңлыйбыз”, - дип белдерде республика башлыгы.

Бөтендөнья сәүдә оешмасы генераль директоры Рөстәм Миңнехановка алда Россиянең Бөтендөнья сәүдә оешмасына керүе белән бәйле мөмкин булган оештыру мәсьәләләре буенча ярдәм итәргә вәгъдә бирде. Паскаль Лами ТР Президентына Татарстан делегациясе белән бергә, бу мәсьәләләр турында тулырак сөйләшү өчен, оешманың Женевадагы штаб-фатирына килергә тәкъдим ясады.