Рөстәм Миңнеханов: "Татарстан япон эшкуарларына уңайлы шартлар тудырырга әзер"

Бүген Казанда V Россия-Япония инвестиция форумы үз эшен башлап җибәрде, ул ике яклы Россия-Япония хезмәттәшлегенең төп чарасы булып тора. Аның төп максаты – сәүдә-икътисад элемтәләрен үстерү һәм ныгыту, инвестицияләрне җәлеп итү.

Форумның ачылу тантанасында Татарстан Президенты Рөстәм Миңнеханов, Япония икътисад, сәүдә һәм сәнәгать министры Юкио Эдано, РФ икътисад үсеше министрының урынбасары Олег Савельев, Ульяновски төбәге губернаторы Сергей Морозов һәм башка затлар катнашты.

Форум эшендә инновацияләр өлкәсендә хезмәттәшлек, югары технологияле җитештерү, фәнни тикшеренүләр һәм эшләп чыгаруларны, ягулык-энергетика комплексы, химия сәнәгате, инфраструктура һәм транспорт (шул исәптән, автомобиль сәнәгате һәм мототехника), азык-төлек тармагы һәм азык-төлек сәнәгате, медицина сәнәгате һәм фармацевтика кебек приоритетлы өлкәләрдә инвестицион проектларны финанс-кредит яктан тәэмин итү технологияләрен һәм коралларын коммерциаләштерү мәсьәләләренә аерым игътибар биреләчәк.

Чарада катнашучыларны Татарстан Президенты сәламләде. “Безнең өчен мондый масштаблы вакыйганы кабул итү зур хөрмәт”, - диде ул.

“Без соңгы 10 ел эчендә әһәмиятле Россия-Япония хезмәттәшлегенең шаһитләре булдык. Үзара товар әйләнеше үсә, күмәк проектларның саны арта, инвестиция йогынтысы киңәя. Россия Федерациясенең иң көчле динамик рәвештә үсә торган субъектларының берсе буларак, Татарстан Республикасы бу процессның актив катнашучысы булып тора”, - дип аерып ассызыклады республика башлыгы.

Ул шулай ук ТРда уңайлы инвестицион климат булуын, чит ил капиталын җәлеп итү өчен шартлар тудырылуын, инвесторларга дәүләт ярдәме чаралары булдырылуын билгеләде. Моннан тыш, ел саен чит ил капиталы катнашында уртак предприятиеләрнең саны арта. 2011 елда Татарстан Республикасы “Forbes” версиясе буенча бизнесны һәм инвестицияләрне алып бару өчен Россиянең 30 иң яхшы регионы исемлегендә беренчелекне алды. Аның сүзләре буенча, 2013 елгы Универсиадага, 2015 елгы су төрләре спорты буенча дөнья чемпионатына, 2018 елгы футбол буенча дөнья чемпионатына әзерләнү, эре инфраструктур һәм сәнәгать проектларын тормышка ашыру “Япония бизнесына яхшы мөмкинлекләр бирә”.

Президент Татарстанда инде бер төркем Япония компанияләре эшләвен дә искәртте. Шулай “Mitsubishi Heavy Industries” һәм “Sojitz” компанияләре белән берлектә яңа “Аммоний” газохимия заводы төзелә. Ул бу проектны уңышлы тормышка ашыру Татарстан Республикасы өчен генә түгел, ә Россия Федерациясе өчен дә зур әһәмияткә ия дип саный.

Шулай ук Татарстан эре заводларында: “Нижнекамскнефтехим”, “Казаньоргсинтез”, ”Танеко” - эшләгән “Yokogawa Electric” корпорациясе белән тыгыз хезмәттәшлек итә.

Үткән елның сентябрь аенда Казан дәүләт технология университеты базасында “Yokogawa” компаниясе лабораториясенең танатаналы ачылышы булды.

“Без күп еллар дәвамында Россия һәм Көнчыгыш Европа белән сәүдә буенча “ROTOBO” Япония ассоциациясе һәм тышкы сәүдә үсеше буенча “JETRO” Япония оешмасы белән уңышлы эшлибез, - диде Рөстәм Миңнеханов. – Күп кенә Япония компанияләренең технологияләре һәм капиталлары нефтехимия производстволарын, машина төзелеше предприятиеләрен яңарту, сәламәтлек саклау һәм авыл хуҗалыгын үстерү, республиканы мәгълүматлаштыру һәм башка өлкәләрдә файдаланылды”.

ТР Президенты Япония бизнесменнарына мөрәҗәгать иткәндә республика җитәкчелегенең Япония бизнесына Татарстанның инвестицион мөмкинлекләрен күрсәтергә әзер булуын хәбәр итте. “Бүген Россия базары динамик рәвештә үсә, һәм безнең өчен Россиягә килергә планлаштырган Япония компанияләре башлангыч мәйдан сыйфатында безнең республиканы сайлавы яхшы булыр иде. Татарстан үз чиратында Япония эшмәкәрләрен үз бизнесларын алып бару өчен уңайлы шартлар тудырырга тәэмин итәргә әзер”, - дип белдерде Рөстәм Миңнеханов. “Алабуга” ОЭЗда Япония предприятиеләрен ачу да хупланыла. Моннан тыш, безнең республикада Япония инвесторлары хезмәте өчен технопарклар, технополислар, бизнес-инкубаторлар челтәре, инвестицион һәм венчур фондлары бар.

Рөстәм Миңнеханов чыгышының соңында чарада катнашучыларга нәтиҗәле эш һәм Татарстанда булудан яхшы тәэсирләр калуын теләде.

Япония икътисад, сәүдә һәм сәнәгать министры Юкио Эдано форумны ачу тантанасында чараны оештырган өчен Татарстанга рәхмәтен белдерде. Япония министры Япониянең яңа икътисад сәясәте турында сөйләде. Ул илнең икътисады алдында 3 бурыч торуын билгеләде. Бу – яңа товарлар җитештерү буенча тармаклар булдыру, Тын океан регионында икътисади элемтәләрне ныгыту (Россия, аның сүзләренә караганда, Япониянең иң төп партнерларының берсе), бөтен дөньяда көчәйгән энергетика һәм экология мәсьәләләрен чишү өчен инновацияләрне куллану. Шул ук вакытта Россия белән эшлекле мөнәсәбәтләр бик мөһим, дип саный ул. “2012 ел Россия- Япония мөнәсәбәтләрендә яңа битне ачу елы булырга тиеш”, - дип билгеләде министр.

Безнең илнең икътисадының перспективалары турында РФ икътисад үсеше министры урынбасары Олег Савельев сөйләде. “Россиянең төп үсеш юнәлешләре булып икътисадны диверсификацияләү, углеводород һәм чимал экспортыннан бәйлелекне киметү”, - диде ул. Инновацион продукциянең өлеше ил производствосының гомуми җитештерү күләмендә 2020 елга 25-30 процентка артуы планлаштырыла (хәзер бу сан 4,5-5 процентны тәшкил итә). “Бу - реаль сан”, - дип билгеләде ул. Министр урынбасары бу мәсьәләне чишү өчен тикшеренү һәм эшләп чыгару секторын сизелерлек көчәйтергә кирәклеген ассызыклады. Моннан тыш, яңа югары технологияле җитештерүләрнең барлыкка килүен стимуллаштыру кораллары бик әһәмиятле булып тора.

Форумның тантаналы ачылыш өлешеннән соң берничә килешүгә кул куелды. Аерым алганда, Красноярск краеның Енисей районында техник бинаны Ангар Пейп Лесохимия комплексын проектлаштыру һәм төзү өчен раслау турында килешүгә кул куелды. Проектның бәясе – 3,2 миллиард доллар.