Александр Белов ТР Президента каршындагы дәүләт хезмәткәрләре эшләре буенча департамент җитәкчесе булып билгеләнде

Бүген ТР Президенты Рөстәм Миңнеханов Александр Беловны ТР Президенты каршындагы Дәүләт хезмәткәрләре эшләре буенча департамент җитәкчесе итеп билгеләү турындагы Указны имзалаган.
Белов Александр Николаевич 1976 елның 5 июлендә ТАССРның Апас районы Төбәк Черкене авылында туа. 1998 елда Казан дәүләт университетын хокук белгечлеге, ә 2007 елда – Казан дәүләт финанс-икътисад институын менеджмент белгечлеге буенча тәмамлый.
Университетны тәмамлаганнан соң, 1998 елда Татарстан Республикасы Дәүләт милке белән идарә итү буенча дәүләт комитетында әйдәүче белгеч, бүлек башлыгы, Хокук идарәсе башлыгы урынбасары вазифаларында эшли. 2001 елдан 2006 елга кадәр Татарстан Республикасы Җир һәм мөлкәт мөнәсәбәтләре министрлыгының Хокук идарәсе башлыгы була. 2006 елдан 2007 елга кадәр Татарстан Республикасы Министрлар Кабинеты Аппаратының Хокук идарәсендә граждан хокуклары һәм хуҗалык хокук мөнәсәбәтләре секторы мөдире вазифасында. 2007 елдан – Татарстан Республикасы Министрлар Кабинеты Аппаратының Дәүләт хакимияте һәм җирле үзидарә башкарма органнарының үзара хезмәттәшлеген оештыру бүлеге башлыгы.