Дмитрий Медведев Казандагы авиазавод эше белән танышты

Казанда эшлекле сәфәрдә булган Россия Премьер-министры Дмитрий Медведев әлеге минутларда “Горбунов исемендәге Казан авиация-җитештерү берләшмәсе”ндә авиация тармагын үстерү мәсьәләләре буенча киңәшмә уздыра.
Россия Хөкүмәте башлыгы киңәшмә башланыр алдыннан предприятиенең ахыргача җыю цехында булды. Дмитрий Медведевны Россия Хөкүмәте вице-премьерлары Дмитрий Рогозин һәм Аркадий Дворкович, РФ оборона министры Анатолий Сердюков, РФ финанслар министры Антон Силуанов, Идел буе федераль округында РФ Президентының тулы вәкәләтле вәкиле Михаил Бабич, Татарстан Президенты Рөстәм Миңнеханов, ТР Премьер-министры Илдар Халиков, Берләшкән авиация корпорациясе җитәкчесе Михаил Погосян һәм башка затлар озата барды.
Цехта булганда РФ Премьер-министры төзелә торган Ту-214 авиалайнерларын һәм яңартыла торган Ту-22 М3 стратегик бомбардировщикларын карады, шулай ук авиация сәнәгате белән бәйле предприятиеләрнең һәм фәнни үзәкләрнең продукцияләре һәм технологик эшләнмәләре белән танышты. Аларның эшчәнлеге “Завод Элекон” ААҖ, “ГИПО” НПО ААҖ, “Сокол” ОКБ ААҖ, Туполев исемендәге Казан авиация институты һәм кайбер башка җәмгыятьләрнең авиация тармаклары белән бәйләнгән.
Дмитрий Медведевка Казан авиация-җитештерү берләшмәсен яңарту һәм үстерү өлкәсендә планнар һәм авиация тармагының башка компанияләре белән кооперация проектлары турында сөйләделәр. РФ Премьер-министрына тәкъдим ителгән проектлар рәтендә - Ан-70 хәрби-транспорт самолетын җыю проекты.
Шулай ук Дмитрий Медведев завод эшчеләре белән аралашты, ул авиация тармагын үстерү турында сөйләшүдә “Горбунов исемендәге Казан авиация-җитештерү берләшмәсе”н яңа заказлар белән тәэмин итү мәсьәләре дә темаларның берсе булачагын хәбәр итте.
“Сезнең завод бик яхшы, данлыклы”, - диде РФ Премьер-министры һәм предприятие эшчеләреннән самолетларның яңа модельләрен җитештерүне үзләштерергә хәзерлекләре турында кызыксынды.
“Без сезнең ышанычыгызны акларбыз”, - дип ышандырдылар Хөкүмәт башлыгын завод эшчеләре. Дмитрий Медведевтан предприятие логотибы төшкән фотосурәттә имзасын куюын сорадылар.
“Удачи, производственных успехов. Новых заказов”, - дип язды ул һәм завод эшчләре белән фотога төште.
Россия Хөкүмәте башлыгына заводта булудан истәлек итеп, Ту-22М3 бомбардировщигының моделен бүләк иттеләр.