Рөстәм Миңнеханов: “ICL-КПО ВС” глобаль компания булырга тиеш”

Татарстан җитәкчелеге “ICL-КПО ВС” компаниясен республика IT-секторының әйдәп баручы предприятиесе буларак күрә һәм киләчәктә дөньяви базарга чыгарга ярдәм итәргә әзер. Бу хакта бүген Татарстан Президенты Рөстәм Миңнеханов компаниянең Директор советы әгъзалары белән очрашуда белдерде.
Анда вице-премьер – ТР мәгълүматлаштыру һәм элемтә министры Роман Шәйхетдинов, ТР икътисад министры Мидхәт Шаһиәхмәтов, республика мәгариф һәм фән министры Альберт Гыйльметдинов катнашты.
Татарстан Президенты Директорлар советы әгъзаларын сәламләде һәм акционерлар җыелышында катнашучылар 2011 елда “ICL-КПО ВС” менеджменты эше нәтиҗәләрен тиешенчә бәяләр дип өметләнүен белдерде. Рөстәм Миңнеханов фикеренә караганда, компания бизнесны үстерү буенча зур эш алып бара, перспективалы проектларны гамәлгә куя. “Бу эшне сакларга гына түгел, ә үстерү зарур. Сез глобаль компания булырга, ә без уңышка ирешү өчен ярдәм итәргә тиеш, - дип мөрәҗәгать итте ТР Президенты Директорлар советы әгъзаларына. – Белгечләр әзерләү, глобаль компанияләргә эшләү һәм алар белән партнерлык элемтәләре урнаштыру үсеш юнәлешләре булып калырга тиеш. Моннан тыш, электрон хезмәтләргә дәүләт структуралары ягыннан да ихтыяҗ арта”.
“Республика һәрвакыт “ICL-КПО ВС” компаниясенә ярдәм итте һәм киләчәктә дә бу эшен дәвам итәчәк”, - дип ассызыклады Рөстәм Миңнеханов.
Компаниянең Директорлар советы рәисе Нив Спелман Рөстәм Миңнехановка “Fujitsu” компанияләре төркемнәренең глобаль планнары турында сөйләде, анда Татарстан предприятиеләре дә керә. Н.Спелман сүзләренә караганда, “ICL-КПО ВС” компаниясе перспективалы үсеш ноктасы буларак “Fujitsu” өчен зур роль уйный.

“ICL-КПО ВС” компаниясенең 2011 ел эш нәтиҗәләре хакында генераль директор Виктор Дьячков белдерде. Аның сүзләренә караганда, узган ел экспорт компания табышының 20 процент тирәсен тәшкил иткән, 39 проценты Татарстанга туры килә. Шул ук вакытта Виктор Дьячков билгеләп үткәнчә, әлегә Татарстанның эре компанияләре “ICL-КПО ВС” хезмәтләрен актив кулланмый.
Татарстан Президенты Рөстәм Миңнеханов Виктор Дьячковка “Татнефтехиминвест-холдинг” Директорлар советы утырышында “ICL-КПО ВС” мөмкинлекләрен ачарга тәкъдим итте.
Рөстәм Миңнеханов компания җитәкчелегенә яңа “Иннополис” инновацион шәһәре резиденты булырга тәкъдим итте. Татарстан Президенты сүзләренә караганда, “Иннополис” Россия IT-индустриясе үзәге булачак һәм “ICL-КПО ВС” җитәкчелегенә компанияне киңәйтү мөмкинлекләрен карарга кирәк булачак.