Рөстәм Миңнеханов Финляндия Президенты Саули Нийнисте белән очрашты

Европа эшләре буенча һәм Финляндиянең тышкы сәүдә министры Александер Стубб Татарстан Республикасына эшлекле сәфәр кылачак. Бу хакта бүген ТР Президенты Рөстәм Миңнеханов һәм Финляндия Президенты Саули Нийнисте очрашуында сүз барды.
Очрашу “Ленэкспо” (Санкт-Петербург) күргәзмә үзәге мәйданында ачылган Петербург халыкара икътисади форум кысаларында узды.
Рөстәм Миңнеханов бүген Финляндиядә яңа җитәкчелек эшләвен билгеләде, һәм Россия Федерациясе регионнарының берсе буларак Татарстан белән мөнәсәбәтләрнең үсеш перспективаларын билгеләүнең мөһимлеген әйтте. Ул очрашуда булган ТР делегациясе вәкилләре: “Татнефть” ААҖ генераль директоры Шәфәгать Тәхаутдинов, ТР Икътисад министры Мидхәт Шаһиәхмәтов һәм ТР Тышкы элемтәләр департаменты директоры – ТР Президентының халыкара мәсьәләләр буенча ярдәмчесе Искәндәр Мөфлиханов - белән таныштырды.
Яклар төрле тармакларда алдагы хәзмәттәшлек мәсьәләләре турында сөйләште. Аерым алганда, Рөстәм Миңнеханов күптән түгел ТР делегациясе ТР Премьер-министры Илдар Халиков җитәкчелегендә Лаппеенранта шәһәрендә Лаппеенранта (Финляндия) технология университеты базасында (LUT) үткән III Россия-Европа инновацион форумы (2012 елның 13 июнендә) эшендә катнашуын искәртте. Рөстәм Миңнеханов сүзләре буенча, Татарстанны Финляндия белән инновацияләр өлкәсендә үзара мөнәсәбәтләр кызыксындыра.
Очрашуда Финляндиядә РФнең Гадәттән тыш һәм Тулы вәкәләтле илчесе һәм Россиядә Финляндиянең Гадәттән тыш һәм Тулы вәкәләтле илчесе булды.