ТР Президенты: "Сабан туе - бөтен илебез өчен иң яраткан бәйрәмнәрнең берсе"

Бүген Татарстан Президенты Рөстәм Миңнеханов Казан сабантуенда катнашты. Республика башлыгы Мирный бистәсенең Каенлык үзәк мәйданында булды.

Биредә традицион бәйрәм чаралары 11 мәйданда уза, аларны ТР Авыл хуҗалыгы һәм азык-төлек министрлыгы авыл ишегалды кебек бизәүне оештырган.

Агач избалар, таштан салынган сукмаклар, бүрәнәдән ясалган кое, агач күперле ясалма сулыклар, атлар, яңа чабылган печән – болар барысы да авыл көнкүрешен, авыл тормышын сурәтли.

Быел Казан сабантуеның төп мәйданында Буа, Саба, Арча, Чүпрәле, Балык Бистәсе, Кукмара, Лаеш, Биектау муниципаль районары үз экспозицияләрен тәкъдим итә.

Моннан тыш, шәһәрнең өстәмә белем бирү учреждениеләре тарафыннан балалар иҗат мәйданчыгы оештырылган, анда балалар фольклор коллективлары, балалар иҗаты күргәзмәсе, Сабантуйга һәм 2013 елгы Универсиадага багышланган төрле конкурслар һәм акцияләр уза.

Рөстәм Миңнеханов белән башка дәрәҗәле кунаклар үзәк мәйданга юл тотканчы авыл ишегалды сурәтләнгән мәйданчыкларны карады, районнар экспозицияләре белән танышты, Сабантуй кунаклары белән аралаштылар. Бәйрәмнең дәрәҗәле кунаклары арасында ТР Дәүләт киңәшчесе Минтимер Шәймиев, РФ оборона министрының беренче урынбасары Николай Макаров, ТР вице-премьеры – авыл хуҗалыгы һәм азык-төлек министры Марат Әхмәтов, ТР вице-премьеры Әсгать Сәфәров, Казан мэры Илсур Метшин һ.б. бар иде.

Татартсан Президенты төп мәйданнан кунакларны һәм катнашучыларны сәламләп, бүген Россиянең 54 төбәгендә һәм 22 илдә Сабантуй уздыралар дип белдерде. “Бу татарларның иң яраткан бәйрәме, әмма аны башка халыклар да бәйрәм итә. Безнең районнар оештырган авыл ишегалды мәйданчыклары безнең ил һәм республиканың халыклар дуслыгын дәлилли. Күптән түгел Истанбулда һәм Алтайда Сабантуйлар үткәрдек, 30 июньдә Ерак Көнчыгышта, аннары Чиләбедә бөтенроссия сабантуе узачак. Әлбәттә, бу бөтен ил өчен иң яраткан бәйрәмнәрнең берсе. Сезне сәламләүгә шатбыз. Барыгызга да бәхет, сәламәтлек һәм Сабантуй һәрвакыт безне берләштерүен телим”, - диде Рөстәм Миңнеханов.