Алексей Песошин Татарстан халкын Космонавтика көне белән котлады
Татарстан Республикасы Премьер-министры Алексей Песошин бүген республика халкын Космонавтика көне белән котлады.
"Хөрмәтле татарстанлылар! Татарстан Хөкүмәте исеменнән һәм шәхсән үз исемемнән сезне Косманавтика көне белән котлыйм! - диелә котлау текстында. - Космонавтика бүген фән һәм техниканың яңа казанышларын кулланырга, җитештерүне яхшыртырга һәм модернизацияләргә мәҗбүр итә. Бу космонавтларның батырлыгы, космос шартларында яшәү һәм эшләү өчен уникаль техника булдырган галимнәр, конструкторлар һәм эшчеләрнең хезмәте аркасында мөмкин булды.
Космик киңлекләрне үзләштерүгә, шулай ук яңа технологияләр булдыруга Казан конструкторлык бюросы һәм фәнни-тикшеренү институтлары эшләнмәләре зур өлеш кертә. Бүген космик киңлекләрне яулап алуның данлы традицияләре лаеклы рәвештә дәвам ителә - якташыбыз, астронавт Сергей Николаевич Рыжиков Халыкара космик станциядә озак космик очышны башкарганда күрсәткән батырлыгы өчен Россия Федерациясе Герое исеменә лаек булды.
Һичшиксез, республикабызның зур сәнәгать, фәнни-техник, мәгариф потенциалын куллану алга таба да космик тармакның нәтиҗәле үсешенә ярдәм итәргә тиеш.
Көндәлек хезмәтләре космосны үзләштерү белән бәйле булган кешеләрнең барысына да чын күңелдән рәхмәт белдерәм.
Татарстан Республикасы Премьер-министры А.В.Песошин”.