Рөстәм Миңнеханов: “Нефть чыгаруда 20-30 елны түгел, ә 100 елны күз уңында тотарга кирәк”

Татарстан нефтьчеләре дә, бөтен республика кебек, Краснодар краенда булган фаҗигагә битараф калмаячак. Бу хакта, Карабаш бистәсендә “нефть саммиты” катнашучылары фаҗигадә һәлак булганнар истәлегенә бер минут тын торганнан соң, Татарстан Президенты Рөстәм Миңнеханов әйтте.
Киңәшмәне ачканда Рөстәм Миңнеханов республиканың нефть тармагы эше турында кайбер мәгълүматларны яңгыратты. Барлыгы 16,228 миллион тонна нефть чыгарылган, шул исәптән, 12,913 миллион - “Татнефть” тарафыннан. Нефть сәнәгате предприятиеләре беренче яртыеллыкта 202 миллиард сумга продукция төяп озаткан, бу үткән елның шушы вакыт күрсәткеченнән 10,5 процентка күбрәк. Шул исәптән, кече нефть компанияләренә 36 миллиард сум туры килә.
Нефть чыгару рентабельлегенең күпмедер күләмдә кимүе билгеләнгән, бу дөнья базарында конъюктур тирбәнешләр белән бәйле. Бюджетның барлык дәрәҗәләренә салым түләүләре 6 ай өчен 172 миллиард сумны тәшкил итәчәк, ТРның консолидацияләнгән бюджеты - 13,3 миллиард.
ТР Президенты чыганак урыннарын эшкәртеп бетерүдә нефтьчеләрнең нәтиҗәле эшләрен билгеләде. Ул монда ук “Татнефть”, Казан дәүләт университеты, “Ритэк” компаниясе экспозицияләрендә тәкъдим ителгән техник уңышларны югары бәяләде.
“Күргәзмә Татарстан нефтьчеләренең уңышларын күрсәтте, - диде Рөстәм Миңнеханов. – Иң мөһиме, КФУ моның белән актив рәвештә шөгыльләнә башлады, чөнки фәннән башка конкурентлык мөмкинлеге булмый”. Ул нефть бирүне үстерү буенча практикларның һәм галимнәрнең эшен активлаштыру яклы булуын белдерде, “һәм шул вакытта без 20-30 елны түгел, ә 100 елны күз уңында тотачакбыз”.
Президент бу өлкәдә бер төркем Татарстан инициативалары хөкүмәтнең федераль органнары тарафыннан хуплануын билгеләде. Шулай кече чыганакларны үзләштерүгә, битумлы нефтьне чыгаруга ташламалар кертелгән.
“Татар-информ” мәгълүмат агентлыгы хәбәрчесенең соравына җавап биргәндә, Рөстәм Миңнеханов кече һәм үзләштерелгән чыганак урыннарында эчке резервларны куллану, авыр нефтьне үзләштерүдә аларны җәлеп итү буенча берничә җитди тәкъдимнәр дә булуын хәбәр итте.
Аерым алганда, Рөстәм Миңнеханов РФнең яңа энергетика министры белән очрашты, һәм алар аның Татарстанга килүе турында сөйләштеләр. Тулаем алганда нефть тармагы мәсьәләләре иң югары дәрәҗәдә ил җитәкчелегенең игътибар үзәгендә тора, дип билгеләде ТР Президенты.
Нефтьчеләргә җир кишәрлекләрен бирүгә бәйле чыккан кыенлыклар темасына кагылып,ТР Президенты үз вакытында ташламалы бәягә җир кишәрлеге алган һәм хәзер кишәрлекләр сату белән бизнес ясарга тырышкан “безнең лендлордлар” турында кискен фикерен әйтте.
“Сезнең эшегез – икмәк җитештерү, мал үстерү, ә җир белән сәүдә итү түгел – ул сезнең бизнес түгел”, - диде ул һәм “нефть чыгару – бар икътисадның нигезе, ул республика ихтияҗына булдыра алганча озак хезмәт итәргә тиеш”, - дип искәртте.