Татарстанда урта белем алганнардан 303 укучыга быел аттестат бирелми

Татарстанда урта белем алганнардан 303 укучыга быел, БДИ сынавын уза алмау сәбәпле, аттестат бирелми. Алар мәҗбүри тапшырылырга тиешле рус теле һәм математикадан имтиханнарның яки икесе дә уңышсыз булган, яки шуларның берсен ике тапкыр тапшырганда да минималь балл җыя алмаган. Алар алдагы икенче “дулкын”да имтихан тапшырырга хокуклы түгел, шулай да, киләсе һәм аннан соңгы елларда чикләнмәгән тапкыр янә БДИ сынавы уза ала. Быел рус теленнән минималь “бусага” - 36 балл, математикадан – 24, һәм болар 2011 елдагыча. Былтыр исә шундый уңышсызлар саны 436 булган, 2010 елда – 661, аннан алдагы елда – 1786.

Татарстан яшьләре тапшырган БДИ нәтиҗәләренең алдан чыгарылган йомгаклары хакында бүген ТР Хөкүмәте йортында, республика муниципаль берәмлекләре белән берлектә, видеоконференция рәвешендә уздырылган брифингта ТР мәгариф һәм фән министры Альберт Гыйльметдинов мәгълүмат бирде. Министр, кичәге шушы 303 укучының язмышы министрлык контроленда, һәркайсына тормышта урынын табарга ярдәм итәчәкбез, дип ышандыра. Алар башлангыч һәм урта һөнәри белем бирү уку йортларының көндезге һәм кичке бүлекләренә хәзер үк керә ала, чөнки аларда аттестат таләп ителми.

Быел Бердәм дәүләт имтиханы тапшырганнар арасыннан 60 нәтиҗә яраксызга чыгарылган, шуларның яртысы чамасы буенча яңадан имтихан тапшыру хокукы бирелми, ягъни бу аттестат алуда йогынты ясамый торган рус теле һәм математика кебек мәҗбүри буларак кабул ителгәннәрдән тыш предметлар буенча имтиханнар.

Мәктәп балаларын аттестатсыз чыгарганнардан “ел да бер үк”ләр рәтендә министр А.Гыйльметдинов Әгерҗе, Балык Бистәсе, Кукмара муниципаль берәмлекләрен атады, инде алар арасына Лаеш районы да кушылган булып чыкты. Гомумән, республика буенча уртача күрсәткечләрдән түбән нәтиҗәле районнар 2 дистәгә җыела. “Бу исә аларда системалы эш алып барылмый дигән сүз. БДИ нәтиҗәләре район буенча йомшак икән, андагы мәгариф җитәкчеләре, укытучылар җитәрлек кадәр дәрәҗәдә эшләми дияргә нигез бар, чөнки республикада барлык шартлар да булдырылган”, - дип басым ясап әйтте министр.