Татарстан Премьер-министры: “ТР мәгариф һәм фән министрын отставкага җибәрү турында планнар һәм ниятләр юк”

“Россия Саклык банкы” ААҖ Татарстан Республикасы Инвестиция-венчур фонды проектларын финанслау белән кызыксына. Бу хакта бүген Татарстан Республикасы Премьер-министры Илдар Халиков “Тройка Диалог” инвестицион компаниясе президенты һәм “Сколково” бизнес-мәктәбенә нигез салучыларның берсе Рубен Варданян белән очрашуда белдерде.

Очрашу ТР Хөкүмәт йортында узды. Яклар киләчәктә инвестицион проектларны, мәгариф программаларын гамәлгә кую мәсьәләләре буенча фикер алышты.

Аерым алганда, якын арада инвестиция проектлары һәм аларны финанслау вариантлары ТР Инвестиция-венчур фонды, Россия Саклык банкы белгечләре белән бергә каралачак, дип белдерде Илдар Халиков.

Рубен Варданян мәгариф программалары өлкәсендә хезмәттәшлек итү турында: “Бүген Татарстан Республикасыннан берничә белгеч “Сколково” бизнес-мәктәбендә укый, алар югары дәрәҗәдә әзерлекле һәм инглиз телен яхшы белүләрен күрсәтә, - диде. - Без бизнес-мәктәптә бизнес-структура вәкилләре белән бергә дәүләт хезмәткәрләре дә белем алуына шат. Киләчәктә алар алган белемнәрен республикада эшләгәндә куллана ала”.

Татарстан Республикасы Премьер-министры Илдар Халиков Рубен Варданян белән очрашуда массакүләм мәгълүмат чараларында ТР мәгариф һәм фән министры Альберт Гыйльметдиновның отставкага китү ихтималы турындагы хәбәрне шәрехләде.

“Бүген теләсә нинди басма теләсә нинди мәгълүмат бирергә мөмкин, - диде Илдар Халиков. – Татарстан Хөкүмәтендә ТР мәгариф һәм фән министрын отставкага җибәрү турында планнар һәм ниятләр юк дип әйтә алам. Альберт Гыйльметдинов “Киләчәк” программасын формалаштыру һәм гамәлгә кую өчен күп эш башкарды. Бу программаны гамәлгә ашыру, мәгариф хезмәткәрләрнең хезмәт хакын сизелерлек арттырырга, укытучылар эше, һөнәри эшчәнлекләрен стимуллаштыру өчен уңайлы шартлар тудырырга мөмкинлек бирде. “Алгарыш” программасына, Россия һәм чит вузларында республика белгечләрен әзерләү программасына килгәндә, Хисап палатасы тикшерүе бу эшчәнлек юнәлешендә җитешсезлекләр булуын күрсәтте. Алар ачыкланды, ТР Мәгариф һәм фән министрлыгы җитешсезлекләрне таныды. Бу юнәлешләр өчен җаваплы белгечләр җәзасын алды һәм без берәүне дә ике тапкыр җавапка тартмаячакбыз”.

Бүген “Алгарыш” программасының норматив базасы үзгәртелде, программаның нәтиҗәлелек мониторингы җайга салынды, дип билгеләп үтте Татарстан Хөкүмәте башлыгы.