Казанда метрополитенның икенче чираты төгәлләнгән

Казанда “Декабристлар” (эшче исеме) станциясеннән “Кәҗә бистәсе”нә кадәр уң як тоннельне казу тәмамланды. “Алтынчәч” тоннельүткәргеч комплексын каршы алу чарасында Татарстан Президенты Рөстәм Миңнеханов, Казан шәһәре мэры Илсур Метшин, ТР Төзелеш, архитектура һәм ТКХ министры Ирек Фәйзуллин, “Метроэлектротранс” МУП генераль директоры Әсфан Галәвов, “Казметрострой” МУП җитәкчесе Марат Рәхимов катнашты.
“Метро төзүчеләрне чираттагы уңышы белән тәбриклим. Бу безнең һөнәр осталарының зур җиңүе”, - дип башлады чыгышын Рөстәм Миңнеханов. Президент искәртеп узганча, 2013 нче елның маенда 3 станция файдалануга тапшырылса, 10 станцияне казанлылар һәм башкала кунаклары 18 минут эчендә уза алачак. “Безнең эш моның белән генә тәмамланмый: киләчәктә метрополитен юлы озынлыгын 11 нче станция белән озынайтырга ниятлибез, без шулай ук башка диагональ линия дә төзиячәкбез”, - дип белдерде Президент.
“Бүгенге көн шатлыклы, шул ук вакытта да моңсу да, чөнки эш тәмамланып килә. Ләкин Президентның сүзләре безнең күңелләргә өмет өстәде, димәк “Казметрострой” оешмасы халык өчен эшләвен дәвам итәчәк”, - дип билгеләп үтте Марат Рәхимов. Ә хәзергә ул алда Заречье районы халкын 3 станция белән тәэмин итү максаты торганлыгын искәртеп, Президент куйган бурычка хезмәт итәчәкләрен белдерде һәм киләсе елның маенда аларны кулланылышка тапшырырга вәгъдә бирде. Марат Рәхимов журналистларга билгеләп үткәнчә, метро төзүчеләр бу эш тәмамлангач “Дубравная” станциясе төзелешенә керешәчәк.
“Алтынчәч” тоннельүткәргеч комплексының “Кәҗә бистәсе”нә чыгышы Казан метрополитенының беренче линиясенең икенче чираты төзелешендә соңгысы булып санала. Шул рәвешле, төзелүче станцияләр хәзер гамәлдә булган Казан метросы чыбыгы белән ахыргача тоташтырылган.
Гомуми озынлыгы 1360 метр булган “Декабристлар” станциясеннән “Кәҗә бистәсе” станциясенә кадәр уң як тоннельне казу өчен 7 ай вакыт сарыф ителгән. Әлеге участокта казу эшләренең уртача тизлеге аена 227 метрны тәшкил итә. Казу юлы 18 метр тирәнлектә башкарылган.
Июнь башында “Декабристлар” станциясеннән “Кәҗә бистәсе”нә кадәр сул як тоннельне казу төгәлләнгән. Аны “Айсылу” тоннельүткәргеч комплексы башкарган.
Казанда метроның гомуми озынлыгы хәзер 14 километрны тәшкил итә.