Рөстәм Миңнеханов: “Татарстанда уңышны җыеп алу барышын уңай бәялим”

Бүген Татарстан Президенты Рөстәм Миңнеханов республиканың Алексеевски, Әлки, Нурлат һәм Спас районнары хуҗалыклары кырларында уңыш җыю кампаниясе барышы белән танышты. Аны ТР Премьер-министр урынбасары – авыл хуҗалыгы һәм азык-төлек министры Марат Әхмәтов озатып йөрде.

Республика башлыгы урыннарда һәр районның хуҗалык җитәкчеләре, инвесторлары һәм авыл җирлекләре башлыклары белән очрашты. Рөстәм Миңнеханов кырларда эш барышы белән танышудан тыш, республика районнарында төзелә торган мәдәният йорты, агрофирма һәм крестьян-фермерлык хуҗалыкларын карады.

Республиканың Әлки районында Р.Миңнехановка җирле производство җитештергән продукция күргәзмәсе тәкъдим ителде, моннан тыш, ул Сиктерме-Хузангаево авылында урнашкан “Хузангаевски” авыл хуҗалыгы кооперативы эше белән танышты. Кооператив үсемлекчелек продукциясен җитештерә һәм эшкәртә.

Август уртасында Әлки районында бөртекле культураларны җыеп алу кампаниясен тулысынча төгәлләргә ниятлиләр. Район башлыгы Ф.Дәүләтшин Президент белән очрашуда кырларга су сибү, ашлык сату һәм юлларга асфальт җәю кебек мәсьәләләрне күтәрде. Р.Миңнеханов бу мәсьәләләрне хәл итәргә ярдәм итәргә вәгъдә итте.

Республика башлыгы журналистларга биргән әңгәмәсендә Татарстанда уңышны җыеп алу барышына уңай бәя бирде. “Кырларда эш оештырылган төстә бара. Кызганычка каршы, һава шартлары быел без фаразлаган уңышны җыеп алуга комачаулады, әмма авыл хезмәтчәннәре уңышлы эшләде”, - дип билгеләп үтте ТР Президенты. Һава шартлары тотрыксыз булуга карамастан, заманча технологияләр ярдәмендә бөртекле культуралар белән җитәрлек дәрәҗәдә тәэмин ителдек, дип билгеләп үтте ул.

“Көзге культураларны чәчү өчен ягулык белән тәэмин итү мәсьәләләре хәл ителде. Гаилә фермаларына кагылышлы кайбер тәкъдимнәр эш барышында исәпкә алыначак”, - дип белдерде Р.Миңнеханов.

Бүген республикада беренче миллион ашлык суктырылды, дип билгеләп үтте республика башлыгы. Тагын бер атна дәвамында тагын бер миллион тонна ашлык суктыру планлаштырыла. Ул хәзерге эш темпарын саклау зарур дип ассызыклады.

“Агымдагы ел авыл хуҗалыгы өчен бик уңышлы булмады, яңгыр аз яуды. Әмма шулай булуга карамастан, республиканы икмәк белән тәэмин итү өчен ашлык җитәрлек. Булган ашлыкны кыска вакытта җыеп алу һәм көзге кыр эшләренә керешү зарур”, - иде Рөстәм Миңнеханов.