ТР Президенты Казандагы беренче вариатив балалар бакчасы белән танышты

Моннан бер атналар элек Казанның Азино-1 бистәсендә беренче вариатив балалар бакчасы ишекләрен ачкан иде. Социаль ипотека программасы буенча сафка бастырылган йортлар комплексында, төгәлрәге Крутая урамындагы 2 нче йортның беренче катына урнашкан “Созвездие”-“Йолдызлык” дип исемләнгән әлеге бакча шәхси-дәүләт партнерлыгында төзелгән. Бүген әлеге бакча белән ТР Президенты Рөстәм Миңнеханов танышты. Республика башлыгы бу башлангычны хуплап, йортларның беренче катларында шушындый вариатив балалар бакчаларын булдыруны алга таба дәвам итәргә кирәк, дигән фикер белдерде. Президент белән бакчага Казан мэры Илсур Метшин, ТР мәгариф һәм фән министрынының беренче урынбасары Данил Мостафин, Казан шәһәре мәгариф идарәсе җитәкчесе Илсур Һадиуллин, ТР Дәүләт торак фонды башкаручы директоры Тәлгать Абдуллин да килгән иде.

Рөстәм Миңнеханов ясле төркемендәге балалар белән аралашты, психологик ярдәм бүлмәсен, медицина кабинетларын һ.б. карады. Музыкаль залда сабыйлар республика башлыгына, башка кунакларга үзләренең җыр-биюгә сәләтләрен күрсәтте һәм Президент кулыннан бүләккә йомшак уенчыклар алды.

“Созвездие”-“Йолдызлык”ның директоры һәм гамәлгә куючысы – күп еллар башкаланың 125 нче гимназиясен җитәкләгән Людмила Охолина. Аның сүзләренә караганда, башкаладагы әлеге тәүге вариатив бакча 50 балага исәпләнгән. Әлегә биредә якындагы йортларда яшәүче 26 бала йөри. Алардан ике: ясле һәм урта төркемнәр формалашкан. Көзгә өлкәнрәкләр төркеме оештырылачак.Әти-әниләрдән гаризалар кабул итү дәвам итә. Киләчәктә биредә нәниләр 4 төркемдә шөгыльләнәчәк. Яшь ярымлык сабыйлардан тупланган беренче төркем “Йолдызчыклар”, икенче кече төркем “Зирәкләр” дип атала. Моннан тыш, балалар урта һәм өлкән төркемнәргә кабул ителә. Иртәнге сәгать 7 дән кичке 7 гә кадәр эшләүче бакчага балаларны көн озынына да, 1-3 сәгатькә дә китерергә була. Кыска вакытлы төркемнәр иртәнге сәгать 8 дән көндезге сәгать 1 гә, көндезге бердән кичке сәгать 6 га кадәр эшләчәк. Бакчаның ишегалдында тотып алынган үз уеннар мәйданчыгы да бар.

Бүгенге көндә бакча коллективы 20 хезмәткәрдән тупланган. Аларның икесе тәрбияче, икесе кече тәрбияче. Директорның ассызыклап узуынча, биредә балаларның художестволы-эстетик үсеше төп юнәлеш итеп алынган. Бу җәһәттән балаларның иртә үсеше белән шөгыльләнүче үзәкләрнең эш тәҗрибәсе өйрәнелә. Баланың бу бакчада тулы көн тәрбияләнүе ата-аналар өчен аена 10 мең сумга төшә. Әйләнә-тирәсе тулысынча диярлек социаль ипотека йортларыннан торган бакча өчен бу югары хак кебек күренә. Директорның моңа үз аңлатмасы бар, әлеге суммалар бакчаны кадрлар белән тиешенчә тәэмин итәргә ярдәм итәргә тиеш: “Бүген балалар бакчаларын кадрлар белән тәэмин итү проблемасы актуаль. Шуңа да бирегә аларны яхшы хезмәт хакы белән генә җәлеп итеп була”, -диде ул журналистлар белән булган әңгәмәдә. “Созвездие”-“Йолдызлыкта тәрбияче -12 мең, кече тәрбияче – 10 мең сум ала икән.

Башкаладагы әлеге тәүге вариатив бакча мәктәпкәчә белем бирү өлкәсендә шәхси-дәүләт партнерлыгы проектларын гамәлгә ашыруга узган ел республика грантын откан булган. Нәтиҗәдә, бакча 1 млн 150 мең сумлык җиһазлар белән тәэмин ителгән.

Директор Людмила Охолина киләчәктә “Созвездие”-“Йолдызлык”ны балалар бакчасы һәм мәктәп хезмәттәшлеге үрнәге булган зур учреждение итеп күрергә хыяллана. Бирегә йөрүче өлкән төркем балаларыннан киләчәктә башлангыч сыйныфлар формалаштыру нияте дә бар.