Рөстәм Миңнеханов: “Төп бурыч – кыска вакыт эчендә ашлыкны җыеп алырга”

Бүген ТР Президенты республиканың көньяк-көнчыгыш районнарында урып җыю эшләренең барышы белән танышуны дәвам итте. Ул Мөслим, Минзәлә районнарында булганнан соң, Тукай районына юнәлде.

Татарстан башлыгы вертолеттан бер төркем хуҗалыкларны карап чыкканнан соң, “Агросила групп” ЯАҖ бүлекләренең берсендә, “Кама” агрофирмасының орлык заводында булды. “Кама” агрофирмасы” ҖЧҖ директоры Фәнис Хаҗетдинов сөйләвенчә, завод, “Агросила групп” хуҗалыкларын тәэмин итү өчен, елына 40 мең тонна күләмендә югары сыйфатлы орлык материалын әзерләячәк. Аның сүзләре буенча, югары сыйфатлы орлыклар җитештерү бөртеклеләрнең уңышын 1 гектарга уртача 5-7 центнерга арттырачак.

8 августка Тукай районында мәйданнарның 63 проценты җыеп алынган, бер гектардан уртача уңыш - 25,4 центнер, кайбер хуҗалыкларда – 40 центнер. Район хезмәтчәннәре язгы бодайны җыеп алуга әле яңа гына тотынуларын исәпкә алганда, бу күрсәткеч якын арада үсә ала.

Татарстан Президенты орлык заводын карап чыкканан соң, “Кама” агрофирмасы кырларында булды, шуларның берсендә хуҗалык җитәкчеләре, инвесторлар һәм районның авыл җирлеге башлыклары белән очрашты.

Рөстәм Миңнехановны сәфәрдә озата барган ТР вице-премьеры – авыл хуҗалыгы һәм азык-төлек министры Марат Әхмәтов, очрашуда катнашучыларга мөрәҗәгать иткәндә, республикада якын арада һава шартларының начарлануын ассызыклады, шуңа күрә җыю эшләренең темпын арттырырга, тәүлек буена эшләү режимына күчәргә кирәклеген белдерде.

Рөстәм Миңнеханов бүген районның авыл хуҗалыгы җитештерүчеләрен борчыган мәсьәләләр белән кызыксынды. Хуҗалык җитәкчеләре, аерым алганда, продукцияне сату белән бәйле мәсьәләләр борчыганын әйттеләр. Республика башлыгы Яр Чаллыда Казандагы Агросәнәгать паркы мисалында зур авыл хуҗалыгы базарын төзү мөмкинлеген карарга тәкъдим итте.

“Тулаем алганда, тәэсирләр яхшы, - дип билгеләде, сәфәргә нәтиҗәләр ясаганда, Рөстәм Миңнеханов, - Барлык районнарда эш оештырылган. Быелгы катлаулы һава шартларына кармастан, кырларда икмәк бар, ләкин һава шартларының начарлануы турында фаразлар да бар. Яңгырлар, әлбәттә, кирәк, ләкин күпмегә алар дәвам итәчәк - монысы сорау. Шуңа күрә хәзер төп бурыч - кыска вакыт эчендә ашлыкны җыеп алырга, көзге культураларны чәчү өчен туфракны әзерләргә, барлык эшләрне оештырылган төстә башкарып чыгарга”.