Татарстан Республикасы Президенты Аппаратында структур үзгәрешләр

Татарстан Республикасы Президенты указы белән Татарстан Республикасы Президентының мәгълүмати-аналитик идарәсе юкка чыгарылып, яңа структур бүлекчәләр булдырылган: Татарстан Республикасы Президенты Эксперт идарәсе (идарә башлыгы – Исмәгыйлев Булат Ибраһим улы), Татарстан Республикасы Президенты Аппаратының махсус проектлар бүлеге (бүлек җитәкчесе – Шәмсетдинов Рамил Равил улы), Татарстан Республикасы Президенты Аппаратының Татарстан Республикасы рәсми порталы эшчәнлеген координацияләү бүлеге (бүлек җитәкчесе – Чупаева Мария Андреевна).

Исмәгыйлев Булат Ибраһим улы 1984 елның 10 мартында Казан шәһәрендә туган.
2005 елда “Мәгълүматлаштыру объектларын комплекслы саклау” белгечлеге буенча А.Н.Туполев ис. Казан дәүләт техник университетын тәмамлаган, 2008 елда “техника һәм технологияләр” магистры квалификациясен алган. Хезмәт эшчәнлеген 2001 елда Казан шәһәре Үзәк китапханәсендә система администраторы вазифасында башлаган. 2006 елда Татарстан Республикасы Министрлар Кабинеты Аппаратына кабул ителгән. Биредә ул 2011 елга кадәр Инфокоммуникацияләр, мәгълүматны саклау һәм матди-техник җиһаз бүлегенең баш белгеч вазифасында эшләгән. 2011 елдан бирле мәгълүмати технологияләр, элемтә һәм мәгълүматны саклау бүлеге башлыгы булып эшләгән. 2012 елда Татарстан Республикасы Президенты Эксперт идарәсе башлыгы булып билгеләнгән.

Шәмсетдинов Рамил Равил улы 1979 елның 12 апрелендә Казан шәһәрендә туган.
2003 елда юриспруденция белгечлеге буенча Мәскәү хокук институтын тәмамлаган. 2003 елда Казан шәһәре коммуналь милек белән идарә итү Комитетында әйдәп баручы белгеч вазифасында эшли башлаган. 2006 елда Казан шәһәре муниципаль берәмлеге башкарма комитетының җир һәм милек мөнәсәбәтләре Комитетына эшкә күчерелгән. 2007 елдан алып 2009 елга кадәр Казан шәһәре муниципаль берәмлеге башкарма комитеты Киров районы хакимиятендә баш белгеч булып эшләгән. 2009 елда Татарстан Республикасы җир һәм мөлкәт мөнәсәбәтләре министрлыгы акционерлык җәмгыятьләре эшчәнлеген реформалау һәм көйләү идарәсенең кыйммәтле кәгазьләр бүлеге башлыгы булып билгеләнгән. 2010 елда Татарстан Республикасы җир һәм мөлкәт мөнәсәбәтләре министрлыгы икътисадый тернәкләндерү һәм хосусыйлаштыру идарәсенең икътисадый тернәкләндерү бүлеге башлыгы вазифасына күчерелгән. 2010 елдан бирле Татарстан Республикасы җир һәм мөлкәт мөнәсәбәтләре министрлыгының икътисадый тернәкләндерү һәм хосусыйлаштыру идарәсе башлыгы вазифасында эшләгән. 2012 елда Татарстан Республикасы Президенты Аппаратының махсус проектлар бүлеге җитәкчесе булып билгеләнгән.

Чупаева Мария Андреевна 1983 елның 24 сентябрендә Татар АССРның Кама Тамагы районында урнашкан Куйбышев ис. затон эшчеләр бистәсендә туган.
2006 елда “Мәгълүматны эшкәртү һәм идарәнең автоматлаштырылган системалары” белгечлеге буенча Казан дәүләт технология университетын тәмамлаган.
2006 елдан алып 2011 елга кадәр Казан дәүләт технология университеты “Мәгълүматны җыю һәм эшкәртүнең автоматлаштырылган системалары” кафедрасында ассистент һәм өлкән укытучы булып эшләгән. Соңыннан хезмәт эшчәнлеген Татарстан Республикасы Хөкүмәте рәсми порталы эшләүне тәэмин итү башлыгы вазифасында “Татарстан Республикасы мәгълүмати технологияләр үзәге” дәүләт унитар предприятиесендә дәвам иткән. 2012 елның июненнән бирле Татарстан Республикасы Президенты мәгълүмати-аналитик идарә башлыгы вазифасында эшләгән. 2012 елның августында Татарстан Республикасы Президенты Аппаратының Татарстан Республикасы рәсми порталы эшчәнлеген координациләү бүлеге җитәкчесе булып билгеләнгән.